తెలంగాణకు సీమాంధ్ర కౌంటర్, సమైక్యాంధ్రకే ఓటన్న శైలజానాథ్

By Pratap

Published: Saturday, March 5, 2011, 16:33 [IST]

హైదరాబాద్: తెలంగాణ రాష్ట్ర ఏర్పాటుకు ఒత్తిడి తీవ్రమవుతున్న నేపథ్యంలో సీమాంధ్ర కాంగ్రెసు మంత్రులు, శాసనసభ్యులు, ఎమ్మెల్సీలు శనివారం సమావేశమై ప్రతి వ్యూహాన్ని రూపొందించారు. తెలంగాణ నాయకులు వివిధ ప్రకటనలు చేస్తున్న నేపథ్యంలో తాము సమైక్యాంధ్రకే కట్టుబడి ఉన్నామని చెప్పడానికి ఈ సమావేశం ఏర్పాటు చేసినట్లు సీమాంధ్ర మంత్రి శైలజానాథ్ చెప్పారు. సమైక్యాంధ్ర నినాదంతో తాము శానససభా సమావేశాల తర్వాత ఢిల్లీ వెళ్తామని ఆయన చెప్పారు. శ్రీకృష్ణ కమిటీ నివేదికలోని ఆరో ప్రత్యామ్నాయానికి తాము కట్టుబడి ఉంటామని ఆయన స్పష్టం చేశారు.

మెజారిటీ సభ్యులు సమైక్యాంధ్రనే కోరుకుంటున్నారని ఆయన చెప్పారు. మేలో తెలంగాణపై ఆలోచన చేస్తామని కేంద్ర హోం మంత్రి చిదంబరం చేసిన ప్రకటన బాధ్యతారహితమైన కాంగ్రెసు తెలంగాణ ప్రాంత పార్లమెంటు సభ్యుడు మధు యాష్కీ చేసిన ప్రకటనను మీడియా ప్రతినిధులు ప్రస్తావించగా మధుయాష్కీ చాలా పెద్దవాడు, ఆయన అమెరికాలో ఉండివచ్చినవాడు, తాము ఇక్కడే ఉన్నవాళ్లమని, మధుయాష్కీ లాంటి పెద్దలు ఏమైనా మాట్లాడుతారని ఆయన వ్యాఖ్యానించారు. పెద్దలు పెద్ద మాటలు మాట్లాడుతారని, తాము అంత పెద్ద మాటలు మాట్లాడబోమని ఆయన అన్నారు.

Published On March 5, 2011