అసెంబ్లీ ముట్టడి ఉద్రిక్తం: సిఎం కాన్వాయ్ అడ్డుకునే యత్నం

By Srinivas

Published: Monday, March 14, 2011, 10:35 [IST]

హైదరాబాద్: మాదిగ విద్యార్థి సమాఖ్య ఆధ్వర్యంలో సోమవారం అసెంబ్లీ ముట్టడి కార్యక్రమం హైదరాబాద్‌లో తీవ్ర ఉద్రిక్తతను నెలకొల్పింది. అసెంబ్లీ ముట్టడికి హైదరాబాద్‌లోని వివిధ ప్రాంతాల నుండి భారీగా ఎమ్మార్పీఎస్ కార్యకర్తలు అసెంబ్లీ ముట్టడికి బయలుదేరారు. కొందరు కార్యకర్తలు లక్డీకాపూల్ వద్ద ముఖ్యమంత్రి కిరణ్ కుమార్ రెడ్డి కాన్వాయ్‌ను అడ్డుకునే ప్రయత్నాలు చేశారు. మరికొంత మంది దానం నాగేందర్ కాన్వాయ్‌ను అడ్డుకునేందుకు ప్రయత్నాలు చేశారు.

అయితే పోలీసులు వారిని అదుపులోకి తీసుకున్నారు. సుమారు 80 మంది కార్యకర్తలను పోలీసులు అరెస్టు చేశారు. ఎల్బీ స్టేడియం వద్ద నుండి అసెంబ్లీ ముట్టడికి బయలు దేరిన పలువురు విద్యార్థులను పోలీసులు అదుపులోకి తీసుకున్నారు. ఇందిరాపార్కునుండి అసెంబ్లీ వైపు దూసుకు పోతున్న మహిళా కార్యకర్తలను పోలీసులు అరెస్టు చేశారు. కాగా ముగ్గురు కార్యకర్తలు అత్మహత్యకు ప్రయత్నించగా పోలీసులు అరెస్టు చేశారు. కాగా ఎమ్మార్పీఎస్ అధ్యక్షుడు మంద కృష్ణ మాదిగ ముట్టడి కార్యక్రమంలో పాల్గొంటారనే వార్తలు కూడా వినిపిస్తున్నాయి.

Published On March 14, 2011