తిట్టిన సిపిఎం రాఘవులుకు చంద్రబాబు నాయుడు మద్దతు

By Srinivas

Published: Friday, March 18, 2011, 15:52 [IST]

హైదరాబాద్: నిరాహార దీక్ష ప్రారంభం సమయంలో ప్రతిపక్ష తెలుగుదేశం పార్టీపై ధ్వజమెత్తిన సిపిఎం రాష్ట్ర కార్యదర్శి రాఘవులు దీక్షకు టిడిపి అధ్యక్షుడు చంద్రబాబునాయుడు శుక్రవారం మద్దతు తెలిపారు. ఉదయం దీక్షా శిబిరానికి వెళ్లి సంఘీభావం ప్రకటించారు. ఈ సందర్భంగా చంద్రబాబు ప్రభుత్వంపై విరుచుకు పడ్డారు. ప్రభుత్వం ప్రతిపక్షాల దీక్షను పట్టించుకోపోతే అంతే సంగతులు అన్నారు. పంటలు తీవ్రంగా నష్టపోయిన రైతులను వెంటనే ఆదుకోవాలని డిమాండ్ చేశారు. కౌలుదారులకు న్యాయం చేయాలన్నారు. కార్మిక సమస్యలను పరిష్కరించాలని, నిరుపేదల ఇళ్లు వెంటనే పూర్తి చేయాలన్నారు.

అటవీ హక్కుల చట్టం రాష్ట్రంలో అమలు చేయాలని కోరారు. ప్రభుత్వ రంగ సంస్థల్లో కాంట్రాక్టు విధానాన్ని రద్దు చేయాలని కోరారు. దళి, గిరిజనులకు సరియైన మౌలిక సదుపాయాల కల్పించాలని అన్నారు. రాఘవులు దీక్షకు తమ సంపూర్ణ మద్దతు ఉంటుందని చెప్పారు. రాఘవులు దీక్షపై ప్రభుత్వం వెంటనే స్పందించాలని డిమాండ్ చేశారు.

బిసి, ఎస్టీల సమస్యలపై నిరాహార దీక్షకు దిగిన సమయంలో సిపిఎం రాష్ట్ర కార్యదర్శి రాఘవులు అధికార పక్ష కాంగ్రెసుతో పాటు ప్రతిపక్ష తెలుగుదేశం పార్టీపై కూడా తీవ్రస్థాయిలో ధ్వజమెత్తారు. అసెంబ్లీలో ప్రధాన ప్రతిపక్షం ఉదయం టిఫిన్ చేసి వచ్చి సభను వాయిదా వేయించుకొని పోతోందన్నారు. ప్రతిపక్ష సభ్యులంతా ప్రజా సమస్యలపై దృష్టి సారించకుండా నిద్రావస్థలో ఉన్నారని విమర్శించారు.

Published On March 18, 2011