సిపిఎం కార్యదర్సి బివి రాఘవులు దీక్ష భగ్నం, అస్పత్రికి తరలింపు

హైదరాబాద్: సిపిఎం రాష్ట్ర కార్యదర్శి బీవీ రాఘవులు చేస్తున్న ఆమరణ దీక్షను శనివారం అర్థరాత్రి పోలీసులు భగ్నం చేశారు. రాఘవులుతోపాటు దీక్షలో పాల్గొన్న వీరయ్య, నాగయ్య, బాబూరావులను కూడా గాంధీ ఆస్పత్రికి తరలించారు. అరెస్టుల సందర్భంగా దీక్షా శిబిరం వద్ద పోలీసులకూ, సీపీఎం కార్యకర్తలకూ మధ్య తీవ్ర వాగ్వాదం జరిగి తోపులాటకు దారితీసింది. రాఘవులు ఆస్పత్రిలోనే దీక్షను కొనసాగిస్తారని పార్టీ నేతలు తెలిపారు. ప్రజాసమస్యలను పరిష్కరించాలని డిమాండ్ చేస్తూ రాఘవులు నాలుగు రోజుల క్రితం హైదరాబాదులోని ఇందిరా పార్కు వద్ద నిరవధిక దీక్షను ప్రారంభించిన విషయం తెలిసిందే.

ప్రజల కోసం నాకు బతకాలనే ఉందని, మరణించాలని అనుకోవడం లేదని, అయితే ఈ ప్రభుత్వం ఎంతకాలం మమ్మల్ని బతకనిస్తుందో చూద్దామని సీపీఎం రాష్ట్ర కార్యదర్శి బి.వి.రాఘవులు అంతకు ముందు అన్నారు. ఇక్కడి ఇందిరాపార్కు వద్ద నిరవధిక నిరాహారదీక్షలో ఉన్న రాఘవులకు సంఘీభావం తెలిపేందుకు వచ్చిన లోక్‌సత్తా అధ్యక్షుడు జయప్రకాశ్‌ నారాయణ- 'ప్రజల కోసం దీక్షలు విరమించండి' అని విజ్ఞప్తిచేసినప్పుడు రాఘవులు పైవిధంగా స్పందించారు.

తమ దీక్షల్ని పట్టించుకోకుండా ప్రభుత్వం నిర్లక్ష్యాన్ని ప్రదర్శిస్తుండటం పట్ల వారు నిరసన వ్యక్తంచేస్తున్నారు. తమ డిమాండ్లను పరిష్కరించే దాకా దీక్షల్ని కొనసాగిస్తామని రాఘవులు స్పష్టంగా చెబుతుంటే... అసలు ఆ దీక్షలే అవసరంలేదని ముఖ్యమంత్రి కిరణ్‌కుమార్‌రెడ్డి వ్యాఖ్యానించడం సీపీఎం శ్రేణులకు ఆగ్రహం తెప్పించింది.

English summary

CPM state secretary BV Raghavulu arrested and shifted to Gandhi hospital. It is known that BV Raghavulu started fast 4 days ago on public issues.