సిఎం ఆఫీసుపై జగన్ వర్గం ఫిర్యాదు: పెండింగులో ఫలితం

By Srinivas

Published: Wednesday, March 23, 2011, 12:32 [IST]

చిత్తూరు: మాజీ పార్లమెంటు సభ్యుడు వైయస్ జగన్మోహన్ రెడ్డి వర్గం నేతలు ముఖ్యమంత్రి ఆఫీసుపై స్థానిక ఎన్నికల సంఘం ప్రతినిధులకు ఫిర్యాదు చేశారు. ముఖ్యమంత్రి కిరణ్ కుమార్ రెడ్డి కార్యాలయం రీపోలింగు విషయంలో జోక్యం చేసుకుంటుందని వారు ఆందోళన చేశారు. కాంగ్రెసు అభ్యర్థి నరేష్ కుమార్‌పైన జగన్ అభ్యర్థి తిప్పారెడ్డి తన మొదటి ప్రాధాన్యత ఓటులో ఒకే ఓటుతో గెలుపొందారు. దీంతో కాంగ్రెసు వారు రీకౌంటింగ్‌కు పట్టుబట్టారు. ోఒక ఓటరు తన మొదటి ప్రాధాన్యత ఓటును ఇంగ్లీష్ అంకెలలో వేసి రెండో ప్రధాన్యత ఓటును రోమన్ అంకెలలో వేయడమే ఇందుకు కారణం.

ఇలా ఒక ఓటరు రోమన్ అంకెలు, ఇంగ్లీషు అంకెలు వేయడాన్ని కాంగ్రెసు వారు ప్రశ్నించారు. ఒకే ఓటరు ఇలా రెండు రకాలుగా ఓటు వేయడాన్ని వారు ప్రశ్నించారు. జగన్ వర్గం వారు మాత్రం రీకౌంటింగ్‌ వద్దని పట్టుబట్టారు. దీంతో కాస్త ఉద్రిక్త పరిస్థితి నెలకొంది. జగన్ వర్గం నేత, ముఖ్యమంత్రి కిరణ్ కుమార్ రెడ్డి వర్గానికి బద్దశత్రువు పెద్దిరెడ్డి రామచంద్రారెడ్డి తీవ్ర ఆందోళన వ్యక్తం చేశారు. ఓ సమయంలో ఆయన సొమ్మసిల్లి పడిపోయాడు. రీకౌంటింగ్‌కు నిరసనగా జగన్ వర్గం కార్యకర్తలు చిత్తూరు, పుంగనూరులో బస్సు అద్దాలను ధ్వంసం చేశారు. అయితే జాయింట్ కలెక్టర్ ఆధ్వర్యంలో ఎట్టకేలకు రీకౌంటిగ్ నిర్వహించి ఫలితాన్ని పెండింగులో పెట్టారు.

Published On March 23, 2011