విభజన వద్దే వద్దన్న సీమాంధ్ర ఎంపీలు, భేటీలో పురంధేశ్వరి

By Srinivas

Published: Friday, March 25, 2011, 14:35 [IST]

న్యూఢిల్లీ: ఆంధ్రప్రదేశ్‌ను విభజించ వద్దని పలువురు సీమాంధ్ర ప్రాంతానికి చెందిన పార్లమెంటు సభ్యులు శుక్రవారం రాష్ట్ర వ్యవహారాల ఇంఛార్జ్ గులాం నబీ ఆజాద్ భేటీలో తేల్చి చెప్పినట్లుగా తెలుస్తోంది. ప్రత్యేక తెలంగాణకు ఒప్పుకునేది లేదని ఆజాద్‌కు చెప్పినట్లుగా సమాచారం. మొదట తెలంగాణ ఎంపీలతో సమావేశం అయిన అనంతరం ఆజాద్ సీమాంధ్ర ఎంపీలతో సమావేశమయ్యారు. విభజన ఒప్పుకునేది లేదని చెప్పిన సీమాంధ్రులతో తెలంగాణ ఎంపీలతో కలిసి మరో భేటీ నిర్వహిస్తానని చెప్పారు.

కాగా ఆజాద్ తెలంగాణ అంశాన్నిగానీ, శ్రీకృష్ణ కమిటీ నివేదిక, 8వ అధ్యాయంపైన గానీ భేటీలో చర్చించలేదని ఒంగోలు పార్లమెంటు సభ్యులు మాగుంట శ్రీనివాస్ విలేకరులతో మాట్లాడుతూ చెప్పారు. త్వరలో ఉన్న స్థానిక సంస్థల ఎన్నికలపై, అభివృద్ధిపైన భేటీలో చర్చించారన్నారు. సమైక్యాంధ్రనే ఉంచాలని ఒకరిద్దరు ఎంపీలు అడిగారని ఆయన చెప్పారు. కాగా కేంద్రమంత్రి పురందేశ్వరి ఆజాద్‌తో సమైక్యాంధ్ర పార్లమెంటు సభ్యుల సమావేశంలో పాల్గొన్నారు.

Published On March 25, 2011