సమైక్య రాష్ట్రంలో ప్రాంతాల వారిగా న్యాయం: పోచారం శ్రీనివాస్‌ రెడ్డి

హైదరాబాద్: సమైక్య రాష్ట్రంలో ప్రాంతాల వారిగా న్యాయం ఉంటుందా అని నిజామాబాద్ జిల్లా బాన్సువాడ శాసనసభ్యుడు పోచారం శ్రీనివాస్ రెడ్డి మంగళవారం ఉపసభాపతి నాదెండ్ల మనోహర్‌ను ప్రశ్నించారు. సాక్షాత్తు శాసనసభలో తెలుగుదేశం పార్టీ శాసనసభ్యులపై దాడి చేసిన మంత్రివర్యులపై స్పీకరు చర్యలు ఎందుకు తీసుకోవటం లేదని ప్రశ్నించారు. డ్రైవరు మల్లేష్‌కు ఓ న్యాయం, మంత్రి వివేకాకు మరో న్యాయమా అని ఆయన ప్రశ్నించారు.

సమైక్య రాష్ట్రంలో ప్రాంతాల వారిగా న్యాయం జరుగుతున్నట్టుగా కనిపిస్తోందన్నారు. ప్రత్యేక తెలంగాణ రాష్ట్రం సాధించుకుంటేనే తెలంగాణ ప్రజలకు న్యాయం జరుగుతుందని అన్నారు. తెలంగాణ ప్రజలు, విద్యార్థులు అత్మహత్యలకు పాల్పడవద్దని ఆయన ఈ సందర్భంగా కోరారు. తెలంగాణ సాధించుకునే వరకు అందరం కలిసి పోరాడుదామన్నారు. కాగా తన రాజీనామాను ఆమోదించాలని నాదెండ్ల మనోహర్‌ను కలిసి పోచారం శ్రీనివాస్ రెడ్డి విజ్ఞప్తి చేశారు. తెలంగాణ రాష్ట్ర సాధనకోసం టిఆర్ఎస్‌తో కలిసి ఉద్యమాన్ని ఉధృతంగా చేయడానికే రాజీనామా చేసినట్టు చెప్పారు.