పది కోట్లకు పడగలెత్తిన అధికారి: ఎసిబి సోదాల్లో బయటపడిన నిజం

గుంటూరు: అవినీతి నిరోధక శాఖ చేతికి మరో అవినీతి చేప చిక్కింది. గుంటూరు జిల్లాలోని రేపల్లె ఆర్&బిలో డిఇగా పని చేస్తున్న మోహన్ రావు అక్రమ ఆస్తులు కలిగి ఉన్నాడన్న సమాచారం ఉండటంతో ఎసిబి అధికారులు గురువారం ఉదయం 5 గంటలకే ఆయన ఇంటిపై దాడులు ప్రారంభించారు. ఈ దాడులలో అధికారులు కీలక డాక్యుమెంట్లను కనుగొన్నట్లుగా తెలుస్తోంది. సుమారు రూ.10 కోట్ల విలువైన పత్రాలు వారు కనుగొన్నట్లుగా తెలుస్తోంది.

గురువారం ఉదయం నుండే గుంటూరులోని ఆయన ఇంటిపై అధికారులు దాడులు ప్రారంభించారు. మోహన్ రావు బంధువుల ఇళ్లపై కూడా అధికారులు దాడులు నిర్వహిస్తున్నారు. హైదరాబాదు, గుంటూరు జిల్లాలో భారీగా ఆదాయానికి మించిన ఆస్తులు ఉన్న పత్రాలు వారు కనుగొన్నట్లుగా తెలుస్తోంది. హైదరాబాదులోని అమీర్‌పేటలోని సాయి రెసిడెన్సీలో ఓ ఫ్లోర్, మరో ఆరు ఫ్లాట్లు, గుంటూరులోని మల్లికార్జున నగరం తదితర ప్రాంతాలలో విలువైన భూములు ఉన్నట్లు అధికారులు కనుగొన్నట్లుగా తెలుస్తోంది. అయితే వాటి విలువ రూ.50 లక్షలు ఉండవచ్చుననే అంచనాకు వచ్చినప్పటికీ పది కోట్ల వరకు ఉంటుందని అంచనా కూడా వేస్తున్నట్టుగా తెలుస్తోంది. నాలుగు టీంలో ఏక కాలంలో ఆయన ఇంటిపై, బంధువుల ఇళ్లపై దాడులు నిర్వహించింది.