తిరుమల రద్దీ, వసతి గదుల ఆక్యుపెన్సీలో అవే కీలకం
కేంద్ర వాణిజ్య, పరిశ్రమల శాఖ మంత్రి పీయూష్ గోయెల్ తిరుమలను సందర్శించారు. ఈ ఉదయం శ్రీవేంకటేశ్వర స్వామివారిని దర్శించుకున్నారు. దర్శనానంతరం ఆలయ ప్రాంగణంలో ఉన్న రంగనాయకులవారి మండపంలో వేదపండితులు ఆయనకు వేదాశీర్వచనం అందించారు. స్వామివారి శేషవస్త్రాన్ని బహూకరించారు. టీటీడీ కార్యనిర్వహణాధికారి ముద్దాడ రవిచంద్ర శ్రీవారి తీర్థప్రసాదాలు, చిత్రపటాన్ని అందజేశారు.
అనంతరం పీయూష్ గోయెల్.. ఇంటిగ్రేటెడ్ కమాండ్ అండ్ కంట్రోల్ సెంటర్ ను సందర్శించారు. సుమారు గంట పాటు అక్కడే కలియతిరిగారు. వేర్వేరు విభాగాలను పరిశీలించారు. వాటి పనితీరును అడిగి తెలుసుకున్నారు. తిరుమలలో భక్తుల సేవల నిర్వహణలో ఆర్టిఫీషియల్ ఇంటెలిజెన్స్, ఆధునిక సాంకేతిక పరిజ్ఞానాన్ని వినియోగిస్తున్న తీరుపై హర్షం వ్యక్తం చేశారు. టీటీడీ తీసుకుంటోన్న చర్యలను ఆయన ప్రశంసించారు.
ఈ సందర్భంగా ఆయన మీడియాతో మాట్లాడారు. వైకుంఠం క్యూ కాంప్లెక్స్లో ఏర్పాటు చేసిన ఇంటిగ్రేటెడ్ కమాండ్ అండ్ కంట్రోల్ సెంటర్ (ఐసీసీసీ) ద్వారా వసతి గదుల ఆక్యుపెన్సీ వివరాలు, భక్తుల రాకపోకలు, దర్శన క్యూ లైన్లు, లడ్డూ ప్రసాదాల పంపిణీ వంటి అంశాలను ఎప్పటికప్పుడు పర్యవేక్షించడం వల్ల భక్తులకు మరింత పారదర్శకంగా, సమర్థవంతంగా సేవలు అందుతున్నాయని చెప్పారు. మారుతున్న కాలానికి అనుగుణంగా అత్యాధునిక సాంకేతికతను అందిపుచ్చుకోవాల్సిన అవసరం ఉందని అన్నారు.
కమాండ్ అండ్ కంట్రోల్ సెంటర్ ద్వారా గదుల లభ్యత, వివిధ కంపార్ట్మెంట్లలో వేచి ఉన్న భక్తుల సంఖ్య, గంటల వారీగా తిరుమలకు చేరుకుంటున్న భక్తుల వివరాలు, లడ్డూ ప్రసాదాల పంపిణీ సమాచారం తక్షణమే అందుబాటులోకి వస్తోందని తెలిపారు. ఈ ప్రాజెక్టుకు సహకరించిన ప్రవాస భారతీయ భక్తులకు కృతజ్ఞతలు తెలియజేశారు. 100 రోజుల్లోపే ఆర్టిఫీషియల్ ఆధారిత వ్యవస్థను అందుబాటులోకి తీసుకువచ్చిన టీటీడీ అధికారులను అభినందించారు.
అంతకుముందు ప్రపంచ పర్యావరణ దినోత్సవాన్ని పురస్కరించుకుని నిర్వహించిన "ఏక్ పేడ్ మా కే నామ్" కార్యక్రమంలో పీయూష్ గోయెల్ పాల్గొన్నారు. ఈ సందర్భంగా మొక్కను నాటారు. తిరుమలలో తన తల్లి పేరుతో మొక్క నాటడం ఎంతో సంతోషాన్ని కలిగించిందని అన్నారు. ఈ కార్యక్రమం దేశవ్యాప్తంగా పర్యావరణ పరిరక్షణపై అవగాహన పెంపొందించడంలో కీలక పాత్ర పోషిస్తుందని ఆశాభావం వ్యక్తం చేశారు. ప్రతి చిన్నారి తమ తల్లి పేరు మీద ఒక మొక్కను నాటి, జీవితాంతం దానిని సంరక్షించాలని పిలుపునిచ్చారు.
Click it and Unblock the Notifications
Sign in with Google