జూలైలో టిఆర్ఎస్ విలీనం, తెలంగాణ వచ్చే సమస్యే లేదు: టిజి

By Srinivas

Published: Thursday, March 31, 2011, 15:38 [IST]

కర్నూలు/ మెదక్: ప్రత్యేక తెలంగాణ రాష్ట్రం వచ్చే సమస్యే లేదని చిన్ననీటి పారుదల శాఖమంత్రి టిజి వెంకటేష్ గురువారం కర్నూలు జిల్లాలో వ్యాఖ్యానించారు. కేంద్రం తెలంగాణను ఎట్టి పరిస్థితుల్లోనూ ప్రకటించదన్నారు. తెలంగాణ అంశంపై కేంద్రం ఏర్పాటు చేసిన శ్రీకృష్ణ కమిటీ ఆరవ సూత్రం మేరకే కేంద్రం నిర్ణయం తీసుకునే అవకాశాలు ఉన్నాయన్నారు. తెలంగాణ రాష్ట్ర సమితి పార్టీని ఆ పార్టీ అధ్యక్షుడు కె చంద్రశేఖరరావు కాంగ్రెసు పార్టీలో జూలైలో విలీనం చేస్తారని అన్నారు.

కాగా కడప పార్లమెంటు, పులివెందుల శాసనసభ స్థానాలు గతంలో కాంగ్రెసు పార్టీవేనని 12 సూత్రాల చైర్మన్ తులసీరెడ్డి మెదక్ జిల్లాలో వ్యాఖ్యానించారు. ఇప్పుడు కూడా ఆ రెండు స్థానాల్లో కాంగ్రెసు పార్టీయే గెలుస్తుందని ఆయన అన్నారు. కడప జిల్లాలో జరిగే ఎన్నికలలో తాను ఆశావాహున్ని కాదన్నారు. అభ్యర్థులను పార్టీయే నిర్ణయిస్తుందని అన్నారు.

Published On March 31, 2011