వైయస్ జగన్ బహిరంగ లేఖ: చంద్రబాబు, రామోజీ రావులపై నిప్పులు

By Pratap

Published: Thursday, March 31, 2011, 7:56 [IST]

హైదరాబాద్: భూకేటాయింపులపై ప్రభుత్వం సభా సంఘాన్ని వేయాలని నిర్ణయించడంపై వైయస్సార్ కాంగ్రెసు నేత వైయస్ జగన్ నిప్పులు చెరిగారు. ఈ మేరకు ఆయన ఓ బహిరంగ లేఖ రాశారు. అన్ని పక్షాలు కలిసి ప్రజలకు గంతలు కట్టే ప్రయత్నం చేస్తున్నాయని ఆయన విమర్శించారు. దివంగత ముఖ్యమంత్రి లేకపోవడం వల్ల, ఆత్మగౌరవం కోసం తాను సోనియా గాంధీని ఎదిరించడం వల్ల తెలుగుదేశం, కాంగ్రెసు కలిసి భూ కేటాయింపులపై సభా సంఘం వేయాలని నిర్ణయం తీసుకున్నాయని ఆయన ఆరోపించారు. ఎల్లో మీడియాకు అడ్డుగా ఉన్న సాక్షి తొలగించుకోవడానికి కూడా ఈ కుట్ర జరుగుతోందని ఆయన అన్నారు. రామోజీ రావు నేతృత్వంలో వస్తున్న ఈనాడు దినపత్రికను దృష్టిలో పెట్టుకుని ఆయన ఎల్లో మీడియా అని వ్యాఖ్యానించారు.

తన ఒక్కడిని ఎదుర్కోవడానికి ఇంత డ్రామా నడపాలా అనీ ప్రతిపక్షం, అధికార పక్షం కలిసి ఇంత నీచానికి దిగజారిపోవాలా అనీ ఆయన ప్రశ్నించారు. తను ఎదుర్కోవడానికి అన్నీ పక్షాలూ ఒక్కటై పోయాయని ఆయన వ్యాఖ్యానించారు. అధికార, ప్రతిపక్షాలు మ్యాచ్ ఫిక్సింగ్‌కు పాల్పపడ్డాయని, కుట్ర చేశాయని ఆయన విమర్శించారు. ఢిల్లీ నుంచే తనపై కుట్ర నడుస్తోందని ఆయన అన్నారు. తాను సోనియా గాంధీని ఎదిరించిన తర్వాతనే 2008 - 09 సంవత్సరానికి సంబంధించి సాక్షి పెట్టుబడులపై తనకు నోటీసులు వచ్చాయని ఆయన చెప్పారు.

మార్గదర్శి వ్యవహారంలో రామోజీ రావుకు నోటీసులు రాలేదా, వాటిని ఖాతరు చేశారా, కనీసం డిపాజిటర్ల పేర్లయినా వెల్లడించారా అని ఆయన అడిగారు. లోతు తెలియకుండానే దూకేసే జయప్రకాష్ నారాయణ గానీ, ఈనాడు లేకపోతే బతుకు లేదనుకునే చంద్రబాబు నాయుడు గానీ వాటి గురించి ఏ ఒక్క రోజైనా ప్రశ్నించారా అని ఆయన అడిగారు. రామోజీరావుకు సంబంధించినవైతే మీకు మాటలు రావా, మాట్లాడలేరా అని ఆయన ప్రశ్నించారు.

Published On March 31, 2011