టిడిపి విభేదాలతో మాకు సంబంధం లేదు: పురందేశ్వరి భర్త దగ్గుపాటి

హైదరాబాద్: తెలుగుదేశం పార్టీలోని విభేదాలతో తమకు ఎలాంటి సంబంధం లేదని కేంద్రమంత్రి పురందేశ్వరి భర్త దగ్గుపాటి వెంకటేశ్వరరావు గురువారం విలేకరులతో మాట్లాడుతూ చెప్పారు. అనవసరంగా తెలుగుదేశం పార్టీలో చెలరేగుతున్న వివాదాలకు తమను బాధ్యులను చేయవద్దని కోరారు. ఇప్పటి వరకు కాంగ్రెసు పార్టీలో మాకు లభించిన పదవులతో మేం సంతృప్తిగానే ఉన్నామని చెప్పారు. అలా కూడా కాదంటే ఇంట్లో కూర్చోవడానికి కూడా సిద్ధంగా ఉన్నామన్నారు. కానీ అనవసరంగా మమ్మల్ని మాత్రం వివాదంలోకి లాగవద్దని కోరారు.

కాగా గురువారం ఓ పత్రికలో తెలుగుదేశం పార్టీలో ఆధిపత్య పోరు సాగుతుందని దానికి కారణం పురందేశ్వరి అని వచ్చిన విషయం తెలిసిందే. టిడిపి అధ్యక్షుడు చంద్రబాబుకు, ఎంపీ హరికష్ణకు మధ్యన మళ్లీ విభేదాలు పొడసూపుతున్నాయని అందులో వచ్చింది. నందమూరి వంశం చంద్రబాబుతో విభేదిస్తున్నదని, అయితే హరికృష్ణ బయట పడుతున్నప్పటికీ బాలకృష్ణ మొహమాటస్తుడు కావడం వల్ల వివాదాలకు దూరంగా ఉంటున్నారని వార్త ప్రచురించింది. హరికృష్ణను పురందేశ్వరి ముఖ్యమంత్రి పదవి కోసం వెనుక ఉండి నడిపిస్తుందని ఆరోపించింది. విజయవాడలో ఇటీవల చోటు చేసుకున్న విభేదాలు కూడా అందులో భాగమేనని చెప్పింది.

English summary

Central Minister Purandeswari husband Daggupati Venkateswara Rao confirmed that thy have no link with TDP differences. He said they have satisfied with their posts.