పక్కా వ్యూహంతోనే రాజీనామా చేయడం లేదు: సబ్బం హరి

గుంటూరు: రాజకీయపరంగా, వ్యూహం పరంగా కొన్ని రోజులు మేం పదవిలో ఉండాలి కాబట్టి ఇంకా రాజీనామా చేయలేదని లేదంటే ఎప్పుడో కాంగ్రెసు నుండి బయటకు వచ్చే వారమని అనకాపల్లి పార్లమెంటు సభ్యుడు సబ్బం హరి మంగళవారం గుంటూరులో జగన్ దీక్ష విరమణ సమయంలో మాట్లాడుతూ స్పష్టం చేశారు. త్వరలో కాంగ్రెసును వీడతామని చెప్పారు. వైయస్ఆర్ కాంగ్రెసు పార్టీ అధ్యక్షుడు వైయస్ జగన్మోన్ రెడ్డితో పోటీ పడగల నాయకుడు దేశంలోనే ఎవరూ కనిపించరని అన్నారు. రాష్ట్రంలో ఎన్నికలు ఎక్కడ జరిగినా కడప ఉప ఎన్నికల ఫలితాలే కనిపిస్తాయని చెప్పారు. నాయకుడు ఎలా ఉండాలో జగన్ నిరూపించారని చెప్పారు. 40 రోజుల పాటు మండుటెండలో తిరిగి ప్రజలలో ఉండగలిగే వాడే నాయకుడు అని నిరూపించాడని అన్నారు.

ప్రజల కోసం ఇంతలా శ్రమించే నాయకున్ని తాను ఇంత వరకు చూడలేదన్నారు. దివంగత ముఖ్యమంత్రి వైయస్ రాజశేఖరరెడ్డి రాష్ట్రంలోని ప్రతి వర్గానికి ప్రాధాన్యత ఇచ్చారన్నారు. రాష్ట్రంలో వైయస్ లాంటి పాలన కేవలం జగన్ వల్లనే సాధ్యం అని చెప్పారు. జగన్ వెంట వెళ్లడానికి తాము రాజీనామాలకు కూడా సిద్ధమని ప్రకటించారు. కాంగ్రెసు ప్రభుత్వం రాష్ట్రంలో, దేశంలో అధికారంలో ఉందని అయినప్పటికీ రైతుల సమస్యలు తీరడం లేదన్నారు. కాంగ్రెసు తమకు ఎంపీ పదవి కంటే మరెంతో పెద్ద పదవిని ఇచ్చే అవకాశం లేదన్నారు. జగన్ కోసం అలాంటి పదవిని వదులుకోవడానికి సిద్ధం అని చెప్పారు. ప్రజలు ఎక్కడ ఉంటే నాయకులు అక్కడే ఉంటారని, ఇప్పుడు ప్రజలు జగన్ వెంట ఉన్నారు కాబట్టి తాము జగన్ వెంట వెళ్లడానికి సిద్ధంగా ఉన్నామన్నారు.

English summary

Anakapalli MP Sabbam Hari clarified that Jagan camp leaders are not resigning with political strategy.