తెలుగుదేశం శాసనసభ్యుడు రేవంత్ రెడ్డి కారుపై రాళ్ల దాడి

By Pratap

Published: Wednesday, May 25, 2011, 15:57 [IST]

సంగారెడ్డి‌: రైఫిల్‌తో కరీంనగర్ తెలంగాణ రణభేరి సభకు బయలుదేరిన తెలుగుదేశం తెలంగాణ ప్రాంత శానససభ్యుడు రేవంత్ రెడ్డి కారుపై బుధవారం మెదక్ జిల్లాలో రాళ్ల దాడి జరిగింది. మెదక్ జిల్లా నాగులబండ గ్రామం వద్ద తెలంగాణవాదులు ఆయన కారుపై దాడి చేశారు. కరీంనగర్ రణభేరీ సభకు బయలుదేరుతూ రేవంత్ రెడ్డి తన రైఫిల్‌ను బహిరంగంగా ప్రదర్శించడం వివాదంగా మారింది. రేవంత్ రెడ్డి తీరును తెలుగుదేశం శాసనసభ్యుడు నాగం జనార్దన్ రెడ్డి కూడా తప్పు పట్టారు.

రేవంత్ రెడ్డి రెచ్చగొట్టే విధంగా వ్యవహరించారని, అందుకే దాడి జరిగి ఉంటుందని తెలంగాణ రాష్ట్ర సమితి (తెరాస) శాసనసభ్యుడు హరీష్ రావు అన్నారు. తమ అరెస్టుకు నిరసనగా హరీష్ రావు పోలీసు స్టేషన్‌లో ధర్నా చేస్తున్నారు. రేవంత్ రెడ్డిని అరెస్టు చేయాలని ఆయన డిమాండ్ చేశారు. ఆత్మరక్షణ కోసమే తాను రైఫిల్‌ను ఉంచుకున్నట్లు రేవంత్ రెడ్డి చెప్పారు. రేవంత్ రెడ్డి యుద్ధం ఎవరిపై అని తెలంగాణవాదులు ప్రశ్నిస్తున్నారు.

Published On May 25, 2011