జగన్‌కు మూడేళ్లు ఉంది, సిఎంతో విభేదాలు లేవు: ఆనం

By Srinivas

Published: Tuesday, May 31, 2011, 16:12 [IST]

హైదరాబాద్: వైయస్ఆర్ కాంగ్రెసు పార్టీ అధ్యక్షుడు వైయస్ జగన్మోహన్ రెడ్డి మధ్యంతర ఎన్నికలు కాంక్షిస్తున్నాడని కాని జగన్‌కు మరో మూడేళ్ల సమయం ఉందని ఆర్థిక శాఖ మంత్రి ఆనం రామనారాయణ రెడ్డి మంగళవారం విలేకరులతో మాట్లాడుతూ చెప్పారు. రాష్ట్రంలో కాంగ్రెసు గానీ, ప్రభుత్వం గానీ ఎలాంటి అయోమయంలో లేవన్నారు. అస్తవ్యస్థమనే దానికి అర్థం లేదని అన్నారు. మాజీ ముఖ్యమంత్రి నేదురుమల్లి జనార్దన్ రెడ్డి వ్యాఖ్యలపై తాను ఎలాంటి వ్యాఖ్యలు ప్రస్తుతానికి చేయదల్చుకోలేదన్నారు. ఆయన వివరణ తీసుకున్న తర్వాతనే తాను మాట్లాడతానని చెప్పారు. తనకు ముఖ్యమంత్రి కిరణ్ కుమార్ రెడ్డికి మధ్య విభేదాలు ఉన్నాయన్న వార్తలో నిజం లేదన్నారు. తనపై నమ్మకం ఉన్నందువల్లే తనకు ఆర్థిక శాఖను అప్పగించారని అన్నారు.

ఆర్థిక శాఖ సమావేశాలకు వెళ్లక పోవడానికి ప్రత్యేక కారణాలు ఏమీ లేవన్నారు. ప్రతి పక్షానికి అవిశ్వాసం పెట్టే హక్కు ఉందన్నారు. ఎవరు అవిశ్వాసం పెట్టుకున్నా ప్రభుత్వం ఖచ్చితంగా నిలబడుతుందన్నారు. ప్రభుత్వానికి ఎలాంటి ఢోకా లేదన్నారు. ప్రతిపక్షాలు మూడేళ్లలో ఎన్నిసార్లు అయినా అవిశ్వాసం పెట్టుకోవచ్చన్నారు. కాంగ్రెసు ఎమ్మెల్యేలు అందరూ ప్రభుత్వానికి మద్దతు ఇస్తారని అన్నారు. తాను ప్రతి మంగళవారం సిఎల్పీ కార్యాలయానికి వస్తానని చెప్పారు. తాను ఎప్పుడూ కార్యకర్తలకు అందుబాటులోనే ఉంటానన్నారు.

Published On May 31, 2011