మీడియా దుమారంతో పార్టీ సమావేశానికి హాజరైన అంబటి రాంబాబు

హైదరాబాద్: వైయస్ జగన్ ఏర్పాటు చేసిన పార్టీ సమావేశానికి తాను హాజరు కాకపోవడంపై దుమారం చెలరేగడంతో వైయస్సార్ కాంగ్రెసు పార్టీ అంబటి రాంబాబు తన మనసు మార్చుకున్నట్లు కనిపిస్తున్నారు. వైయస్ జగన్‌తో విభేదాలున్నాయనే ప్రచారం ముమ్మరం కాకూడదనే ఉద్దేశంతో ఆయన సమావేశానికి వచ్చినట్లు చెబుతున్నారు. తనకు జగన్‌తో విభేదాలు లేవని, ప్రతినిధుల సమావేశం కావడం వల్లనే తాను సమావేశానికి వెళ్లలేదని అంతకు ముందు అంబటి రాంబాబు మీడియాకు సర్ది చెప్పే ప్రయత్నం చేశారు. అయితే, ఆయన గైర్హాజరుపై మీడియాలో వార్తాకథనాలతో దుమారం చెలరేగింది.

నిజానికి, అంబటి రాంబాబు వైయస్ జగన్‌పై అలిగినట్లు చెబుతున్నారు. తనను పార్టీ సెంట్రల్ గవర్నింగ్ కౌన్సిల్‌లోకి తీసుకోకపోవడంపై మనస్తాపానికి గురైనట్లు చెబుతున్నారు. దాంతో కొద్ది రోజులుగా ఆయన జగన్‌కు దూరంగానే ఉంటూ వస్తున్నారు. విజయనగరం జిల్లాలో ఓదార్పు యాత్రను పూర్తి చేసుకుని వచ్చిన వైయస్ జగన్‌ను అంబటి రాంబాబు కలవలేదు. ఇంతకు ముందు ఇలాంటి సందర్భాల్లో క్రమం తప్పకుండా అంబటి రాంబాబు జగన్‌ను కలిసేవారు. ఈసారి ఆ సంప్రదాయాన్ని దెబ్బ తీశారు. ఈ స్థితిలో అంబటి రాంబాబును వైయస్ జగన్ పట్టించుకోవడం కూడా మానేశారని అంటున్నారు. దీనివల్లనే బుధవారంనాటి సమావేశానికి అంబటి రాంబాబును ఆహ్వానించలేదని కూడా అంటున్నారు.

English summary

Ambati Rambabu changed his mind attended to the YSR Congress party meeting held at YS Jagan's residence.