దిగిరాని బాబా రామ్‌దేవ్, రామ్‌లీలా మైదాన్‌లో దీక్ష ప్రారంభం

న్యూఢిల్లీ: నల్లధనానికి వ్యతిరేకంగా యోగా గురు రామ్‌దేవ్ బాబా శనివారం దీక్షను ప్రారంభించారు. శుక్రవారం సాయంత్రం కేంద్ర మంత్రులతో జరిగిన చర్చలు సఫలమైనట్లు తొలుత వార్తలు వచ్చాయి. అయితే, వాటిలో నిజం లేదని రామ్‌దేవ్ తేల్చేశారు. దీక్ష చేపట్టాలనే నిర్ణయించారు. కొద్ది రోజులుగా తన కార్యకలాపాలకు వేదికగా మారిన రామ్‌లీలా మైదానానికి రాత్రి నుంచి పెద్ద యెత్తున అభిమానులు తరలి వస్తున్న నేపథ్యంలో బాబా రామ్‌దేవ్ దీక్షను ప్రారంభించారు.

తన మద్దతుదారులను ఉద్దేశించి ప్రసంగించడానికి రామ్‌దేవ్ శనివారం ఉదయం ఐదు గంటలకు వేదికపైకి వచ్చారు. తన వ్యాయామం, భక్తి గీతాల ద్వారా ప్రజలను ఉల్లాసపరిచే ప్రయత్నం చేశారు. పెద్ద యెత్తున తన దీక్షకు తరలివచ్చిన ప్రజలకు ఆయన కృతజ్ఞతలు తెలిపారు. తన పోరాటం నల్లధనానికి వ్యతిరేకమని, న్యాయం జరిగే వరకు పోరాటం చేస్తానని ఆయన చెప్పారు. వ్యక్తులపై వ్యాఖ్యలు చేయకూడదని ఆయన కోరారు.