డిప్యూటీ స్పీకర్‌గా కాంగ్రెసు పార్టీ అభ్యర్థి మల్లుభట్టి విక్రమార్క ఎన్నిక

హైదరాబాద్: శానససభ డిప్యూటీ స్పీకర్‌గా అధికార కాంగ్రెసు పార్టీ అభ్యర్థి మల్లుభట్టి విక్రమార్క ఎన్నికయ్యారు. స్పీకర్‌గా ఎన్నికైన నాదెండ్ల మనోహర్ శనివారం డిప్యూటీ స్పీకర్ ఎన్నికను నిర్వహించారు. మల్లుభట్టి విక్రమార్కకు 164 ఓట్లు రాగా, తెలుగుదేశం పార్టీ అభ్యర్థి సుద్దాల దేవయ్యకు 88 ఓట్లు వచ్చాయి. డిప్యూటీ స్పీకర్‌గా ఎన్నికైన మల్లుభట్టి విక్రమార్కను నాదెండ్ల మనోహర్ సభాపతి స్థానంపై కూర్చోబెట్టారు.

మల్లుభట్టి విక్రమార్కను ముఖ్యమంత్రి కిరణ్ కుమార్ రెడ్డి, ప్రతిపక్ష నాయకుడు నారా చంద్రబాబు నాయుడు, ప్రజారాజ్యం పార్టీ శాసనసభ్యుడు చిరంజీవి అభినందించారు. సంప్రదాయానికి భిన్నంగా జరిగినా స్పీకర్‌గా నాదెండ్ల మనోహర్, డిప్యూటీ స్పీకర్‌గా మల్లుభట్టి విక్రమార్క ఎన్నిక కావడం సంతోషంగా ఉందని ముఖ్యమంత్రి అన్నారు. కృషి, పట్టుదల, సేవాదృక్పథం వల్ల మల్లుభట్టి విక్రమార్క ఈ స్థానానికి ఎదిగారని ఆయన అన్నారు. స్థానానికి వన్నె తేవాలని చంద్రబాబునాయుడు, చిరంజీవి అన్నారు.

English summary

Congress candidate Mallubhatti Vikramarka elected as assembly deputy speaker.