స్టాక్ మార్కెట్‌లో రూ.2 కోట్లు నష్టం: భార్యాభర్తల ఆత్మహత్య

By Srinivas

Published: Monday, June 6, 2011, 16:25 [IST]

విశాఖపట్నం: విశాఖపట్నంలో ఘోర దుర్ఘటన చోటు చేసుకుంది. స్టాక్ మార్కెట్లో నష్టం రావడంతో భర్త ఆత్మహత్య చేసుకోగా భర్త మరణం తెలిసి భార్య కూడా ఆత్మహత్య చేసుకున్న విషాద సంఘటన చోటు చేసుకుంది. అక్కిరెడ్డిపాలెంలోని ఓ అపార్టుమెంటులో ఉంటున్న రమేష్ చంద్ర సోమవారం స్టాక్ మార్కెట్లో రెండు కోట్ల రూపాయల వరకు నష్టం రావడంతో ఆత్మహత్య చేసుకున్నాడు. అయితే భర్త ఆత్మహత్య చేసుకున్నాడన్న వార్త తెలిసి తన తల్లిగారి ఇంటికి వెళ్లిన భార్య ప్రసన్న కూడా ఆత్మహత్య చేసుకుంది.

రమేష్ చంద్ర గత ఐదేళ్లుగా స్టాక్ మార్కెట్ బ్రోకర్‌గా చేస్తున్నాడు. అతనికి ఇద్దరు పిల్లలు. ఆదివారం సాయంత్రం తన అపార్టుమెంటులోకి వెళ్లిన రమేష్ చంద్ర సోమవారం ఉదయం కూడా బయటకు రాక పోవడంతో పక్కనున్న వారు పోలీసులకు సమాచారం అందించారు. తాను స్టాక్ మార్కెట్లో నష్టం వచ్చిన కారణంగానే ఆత్మహత్య చేసుకున్నట్లు రమేష్ చంద్ర సూసైడ్ నోట్ రాసి చనిపోయారు. భార్యాభర్తల మరణంతో అక్కడ విషాదఛాయలు నెలకొన్నాయి.

Published On June 6, 2011