సీమాంధ్రులకు కీలక పదవులు, తెలంగాణవారికి అన్యాయం: శంకరరావు

By Pratap

Published: Thursday, June 9, 2011, 17:02 [IST]

హైదరాబాద్‌: సీమాంధ్ర నేతలకో కీలక పదవులు ఇచ్చారని రాష్ట్ర చేనేత మంత్రి పి. శంకర రావు విమర్శించారు. దీని వల్ల తెలంగాణలో పార్టీ కార్యకర్తల మనోభావాలు దెబ్బ తింటాయని ఆయన అన్నారు. తెలంగాణకు జరిగిన అన్యాయాన్ని సరిదిద్దాలని ఆయన కాంగ్రెసు అధ్యక్షురాలు సోనియా గాంధీని కోరారు. ఈ మేరకు ఆయన గురువారం సోనియా గాంధీకి లేఖ రాశారు. పదవుల పంపకంలో తెలంగాణవారికి అన్యాయం జరుగుతోందని ఆయన అన్నారు.

మంత్రివర్గంలో తెలంగాణ వారికి మంచి శాఖలు కేటాయించాలని మంత్రి శంకర్‌రావు కోరారు. బడుగు వర్గాలకు చెందిన నేతలకు ప్రాధాన్యత ఇవ్వాలని అధిష్ఠానానికి సూచించారు. ముఖ్యమంత్రి సీమాంధ్ర ప్రాంతానికి చెందిన వారైతే స్పీకర్‌, పీసీసీ అధ్యక్ష పదవులు తెలంగాణ వారికి ఇచ్చే వారని, అయితే ఆ సాంప్రదాయానికి విరుద్దంగా పార్టీ వ్యవహరిస్తోందన్నారు. ఈ అభిప్రాయాన్ని వ్యక్తం చేస్తున్న పలువురు తెలంగాణ మేధావులు రాష్ట్రపతికి, గవర్నర్‌కు, సోనియాకు లేఖలు రాస్తున్నారని చెప్పారు. అధిష్ఠానానికి ముడుపులు అందాయంటూ ఆమోస్‌, యాదవరెడ్డి చేసిన ఆరోపణలను శంకర్‌రావు ఖండించారు. ముడుపులు తీసుకోవాల్సిన అవసరం కాంగ్రెసు అధిష్టానానికి లేదని ఆయన స్పష్టం చేశారు. స్థానిక సంస్థల ఎన్నికల విషయం తనకు తెలియదని ఆయన అన్నారు.

Published On June 9, 2011