తేల్చుకుందామా, సిగ్గుపడుతున్నా: చంద్రబాబుకు నాగం సవాల్

By Srinivas

Published: Saturday, June 18, 2011, 15:37 [IST]

హైదరాబాద్: తెలుగుదేశం పార్టీ అధ్యక్షుడు నారా చంద్రబాబునాయుడుపై ఆ పార్టీ బహిష్కృత శాసనసభ్యుడు నాగం జనార్దన్ రెడ్డి శనివారం మరోసారి తీవ్రంగా ధ్వజమెత్తారు. ఈసారి ఆయన చంద్రబాబు ఆస్తులపై ప్రశ్నించారు. చంద్రబాబు, తాను రాజకీయాల్లోకి వచ్చాక ఎవరు ఎక్కువ కూడబెట్టుకున్నారో తేల్చుకుందామా అని నాగం సవాల్ విసిరారు. చంద్రబాబు తన అక్రమ ఆస్తులను బయట పెట్టాలని డిమాండ్ చేశారు. చంద్రబాబు తన ఆస్తుల వివరాలు చెబితే తాను తన ఆస్తుల వివరాలు వెల్లడిస్తానని అన్నారు. ఇన్నాళ్లూ తాను తెలుగుదేశం పార్టీలో ఉన్నందుకు సిగ్గు పడుతున్నానని అన్నారు. ఒక అపాత్రుడికి అండగా ఉన్నానా అని బాధ వేస్తుందన్నారు.

తెలంగాణలో చంద్రబాబును నమ్మేవారు ఎవరూ లేరన్నారు. తెలంగాణ ప్రత్యేక రాష్ట్రానికి తెలుగుదేశం పార్టీ మద్దతు ఇవ్వకుంటే టిడిపి ఇక్కడ మిగలదని హెచ్చరించారు. ఇన్నాళ్లూ పార్టీలో కొనసాగి తప్పు చేశానని అన్నారు. శాసనసభ్యుడు బోడ జనార్దన్ పై వేటు ఎందుకు వేశారని ఆయన ప్రశ్నించారు. దళితుడు అయినందుకే ఆయనపై వేటు వేశారన్నారు. జై తెలంగాణ అంటే వేటు వేస్తారు, సమైక్యాంధ్ర అంటే ప్రోత్సహిస్తారా అని అన్నారు. చంద్రబాబు క్యాడర్‌ను కాపాడుకునే పరిస్థితిలో లేరన్నారు. ఇలా అయితే పార్టీలో ఎవరూ మిగలరని అన్నారు.

Published On June 18, 2011