భారత దౌత్యవేత్త లైంగిక వాంఛ తీర్చమన్నాడు: మాజీ పనిమనిషి ఆరోపణ

న్యూయార్క్: న్యూయార్క్‌లో భారత కాన్సుల్ జనరల్ ప్రభు దయాళ్‌పై మాజీ పని మనిషి తీవ్ర ఆరోపణలు చేసింది. తనతో లైంగిక వాంఛ తీర్చుకోవడానికి ముందుకు వచ్చారని, తనను బానిసలా చూశారని దయాళ్ మాజీ పని మనిషి సంతోష్ భరద్వాజ్ ఆరోపించింది. అయితే, దయాళ్ ఆమె ఆరోపణలను కొట్టి పారేశారు. తనను రోజులో ఎక్కువ గంటలు పని చేయించారని, పాస్‌పోర్టు లాక్కున్నారని, స్టోరేజ్ క్లోజెట్‌లో పడుకునే ఏర్పాటు చేశారని ఆమె దయాళ్‌పై ఫోర్స్‌డ్ లేబర్ ష్యూట్ దాఖలు చేసింది. తనకు న్యాయం జరగాలని, తనకు న్యాయంగా అందాల్సిన సొమ్ము రాబట్టుకోవడానికి, పాస్‌పోర్టు తిరిగి పొందాలని తాను దావా వేసినట్లు నలుగురు పిల్లల తల్లి సంతోష్ భరద్వాజ్ (45) చెప్పింది. ఈ మేరకు ఆమె తరఫున లీగల్ ఎయిడ్ సొసైటీ ఓ ప్రకటన విడుదల చేసింది.

సంతోష్ భరద్వాజ్ ఆరోపణలను దయాళ్ కొట్టిపారేశారు. తనకు వ్యతిరేకంగా అబద్దాలు చెబుతోందని ఆయన అన్నారు. మెసేజ్ ఇస్తే అదనపు సొమ్ము చెల్లిస్తానని తాను చెప్పినట్లు, ఇది లైంగిక వాంఛ తీర్చుకునే కోరికను వెల్లడించిందని భరద్వాజ్ ఆరోపించడం అంతా తప్పు అని ఆయన అన్నారు. భరద్వాజ్ 2010 జనవరిలో పారిపోయిందని, కాన్సులేట్ బయట పని చేసి మరింత సొమ్ము సంపాదించాలనే ఆమె ఉద్దేశ్యాన్ని తాను తోసి పుచ్చానని, కాన్సులేట్‌లో పనిచేస్తున్నప్పుడు మరో చోట పనిచేయడాన్ని వీసా అనుమతించదని ఆయన వివరించారు. భరద్వాజ్ స్టోర్ రూంలో పడుకోలేదని, మాన్‌పట్టన్‌లోని కాన్సులేట్ భవనం ఐదో అంతస్థులో ఆమెకు గది ఉందని ఆయన స్పష్టం చేశారు. ఆ గదిలో ఆమె దర్జాగా అనుభవించిందని ఆయన చెప్పారు.