బొత్స చర్చలు: మెట్టు దిగని కాంగ్రెసు తెలంగాణ నేతలు

By Pratap

Published: Saturday, July 2, 2011, 14:55 [IST]

హైదరాబాద్‌: తెలంగాణకు చెందిన మంత్రులు, పార్లమెంటు సభ్యులతో ప్రదేశ్ కాంగ్రెసు కమిటీ (పిసిసి) అధ్యక్షుడు బొత్స సత్యనారాయణ జరిపిన చర్చలు విఫలమయ్యాయి. ఆయన శనివారం మధ్యాహ్నం గాంధీభవన్‌లో వారితో చర్చలు జరిపారు. పార్లమెంటు సభ్యులు కె. కేశవ రావు, వివేక్, గుత్తా సుఖేందర్ రెడ్డి, మందా జగన్నాథం, మంత్రులు కె. జానా రెడ్డి తదితరులు ఈ సమావేశంలో పాల్గొన్నారు. తెలంగాణ రాష్ట్ర ప్రక్రియను ప్రారంభిస్తున్నట్లు కేంద్ర హోం మంత్రి డిసెంబర్ 9వ తేదీన చేసిన ప్రకటనకు కట్టుబడుతున్నట్లు పార్టీ అధిష్టానం ప్రకటన చేసే వరకు తాము దిగి వచ్చేది లేదని పార్లమెంటు సభ్యులు స్పష్టం చేశారు.

ముఖ్యమంత్రి కిరణ్ కుమార్ రెడ్డి మంత్రి జానారెడ్డితో జరిపిన చర్చలు కూడా విఫలమైనట్లు తెలుస్తోంది. కాంగ్రెసు అధ్యక్షురాలు సోనియా గాంధీ రాజకీయ సలహాదారు అహ్మద్ పటేల్ కె. కేశవ రావు, ఇతర తెలంగాణ ప్రాంత పార్లమెంటు సభ్యులతో ఫోన్‌లో మాట్లాడారు. తెలంగాణ ప్రాంత నేతలతో చర్చలు జరపాలని అహ్మద్ పటేల్‌తో పాటు పార్టీ ఆంధ్రప్రదేశ్ వ్యవహారాల ఇంచార్జీ గులాం నబీ ఆజాద్ ముఖ్యమంత్రి కిరణ్ కుమార్ రెడ్డికి, బొత్స సత్యనారాయణకు సూచించారు. దాంతో వీరిద్దరు రంగంలోకి దిగి చర్చలు ప్రారంభించారు.

తెలంగాణ సమస్య జఠిలమైందని, సున్నితమైందని, దీనిపై కేంద్రం పరిశీలన జరుపుతోందని, త్వరలో నిర్ణయం తీసుకుంటుందని బొత్స సత్యనారాయణ తెలంగాణ నేతలకు చెప్పారు. సమస్య శాశ్వత పరిష్కారానికి తాను ప్రయత్నిస్తానని కూడా ఆయన హామీ ఇచ్చారు. రాజీనామాల ద్వారా పార్టీని ఇబ్బందుల్లో పెట్టడం సరి కాదని ఆయన వారికి సూచించారు. రాజీనామాల వల్ల రాజకీయ సంక్షోభం తలెత్తుతందే తప్ప తెలంగాణ రాదని కూడా ఆయన చెప్పి చూశారు. అయితే, బొత్స మాటలకు తలొగ్గడానికి వారు నిరాకరించారు.

Published On July 2, 2011