ఎపి రాజకీయాలపై సోనియా అత్యవసర భేటీ

హైదరాబాద్: తెలంగాణ ప్రాంత కాంగ్రెసు ప్రజాప్రతినిధుల రాజీనామాల హెచ్చరికలు ఏఐసిసి అధ్యక్షురాలు సోనియా గాంధీని సైతం తగిలాయి. టి-కాంగ్రెసు రాజీనామాలతో ఆంధ్రప్రదేశ్ రాజకీయాలలో తీవ్ర సంక్షోభం ఎదురవనున్న నేపథ్యంలో ఆమె ట్రబుల్ షూటర్ ప్రణబ్ ముఖర్జీ, అహ్మద్ పటేల్ తదితరులతో ఆదివారం మధ్యాహ్నం మూడు గంటలకు భేటీ కానున్నట్లుగా తెలుస్తోంది. ఆదివారం సోనియా లోక్ పాల్ బిల్లు విషయంపై చర్చించేందుకు పార్టీ నేతలతో సమావేశం కానున్నారు. అయితే తెలంగాణ విషయం ముదిరి పాకాన పడటంతో ఆమె లోక్ పాల్ విషయంతో పాటు తెలంగాణపై ప్రత్యేకంగా ఈ సమావేశంలో దృష్టి సారించే పరిస్థితి కనిపిస్తోంది.

ఇప్పటికే టి-కాంగ్రెసు నేతలను బుజ్జగించే ప్రయత్నాలు అధిష్టానం చేసింది. కేంద్రమంత్రులు, రాష్ట్ర పిసిసి చీఫ్, ముఖ్యమంత్రి తదితరులు తమ తమ ప్రయత్నాలు చేసినప్పటికీ టి-కాంగ్రెసు వెనక్కి తగ్గలేదు. రాత్రంతా ఫోన్లో రాయబారాలు నెరిపింది. తెలంగాణకు చెందిన కేంద్ర మంత్రి జైపాల్ రెడ్డినీ రంగంలోకి దింపారు. దీంతో సోనియా గాంధీ ఈ భేటీలో తెలంగాణ అంశంపై చర్చించనున్నట్లు తెలుస్తోంది. రాజీనామా చేయకుండా ఉండటానికి ఇంకా ఏం చేయాలి. ఒకవేళ వారు రాజీనామా చేసినా తర్వాత అనుసరించాల్సిన వ్యూహాలపై చర్చించనున్నట్లుగా తెలుస్తోంది. రాష్ట్ర వ్యవహారాల ఇంచార్జ్ గులాం నబీ ఆజాద్ చేసిన వ్యాఖ్యలపై టి-నేతలు గుర్రుగా ఉన్న విషయంపై చర్చించే అవకాశం ఉంది.