కాంగ్రెసు రాజీనామాలు నమ్మొద్దు: ఓయు విద్యార్థులు

By Srinivas

Published: Wednesday, July 6, 2011, 11:59 [IST]

హైదరాబాద్: కాంగ్రెసు పార్టీ తెలంగాణ ప్రాంత ప్రజాప్రతినిధులు రాజీనామాల పేరుతో మరోసారి తెలంగాణ ప్రజలను మోసం చేయాలని చూస్తున్నారని, రాజీనామాలతో విశ్వాస ఘాతుకానికి పాల్పడుతున్నారని అలాంటి వారిని విద్యార్థులు ఎవరూ నమ్మడం లేదని ఉస్మానియా విశ్వవిద్యాలయ ఐక్య కార్యాచరణ సమితి విద్యార్థులు బుధవారం అన్నారు. 14ఎఫ్ రద్దు చేయాలంటూ విశ్వవిద్యాలయం నుండి గన్ పార్కు అమరవీరుల స్థూపం వరకు ర్యాలీ ప్రారంభ సమయంలో విద్యార్థులు మీడియా ప్రతినిధులతో మాట్లాడారు.

ఓయు ఆర్ట్స్ కళాశాల నుండి విద్యార్థులు ర్యాలీ ప్రారంభించారు. ప్రభుత్వం 14ఎఫ్ వెంటనే రద్దు చేయాలని వారు డిమాండ్ చేశారు. కేంద్ర ప్రభుత్వం తెలంగాణ రాష్ట్రంపై వెంటనే నిర్ణయం తీసుకోవాలన్నారు. ఉస్మానియా క్యాంపస్‌లో ఉన్న పోలీసు బలగాలను వెనక్కి పిలవాలని విద్యార్థులు డిమాండ్ చేశారు. తాము శాంతియుతంగానే ఆందోళన, ర్యాలీలు చేపట్టినప్పటికీ పోలీసులు మొదట రెచ్చగొట్టే పనులు చేస్తారని అలాంటివి చేయడం మానుకోవాలని కోరారు. కాగా విద్యార్థుల ర్యాలీ కారణంగా ఎలాంటి అవాంఛనీయ సంఘటనలు జరగకుండా ప్రభుత్వం భారీగా పోలీసు బలగాలను మోహరించింది.

Published On July 6, 2011