రాళ్ల వర్షంతో ఓయు ఉద్రిక్తం, టిడిపి మెరుపు ధర్నా

By Srinivas

Published: Wednesday, July 6, 2011, 12:31 [IST]

హైదరాబాద్: ఉస్మానియా విశ్వవిద్యాలయం బుధవారం కూడా ఉద్రిక్తంగా మారింది. విద్యార్థులకు, పోలీసులకు మధ్య వాగ్వాదం, తోపులాట జరిగింది. 14ఎఫ్ రద్దు చేయాలంటూ ఉస్మానియా విశ్వవిద్యాలయం విద్యార్థులు బుధవారం ఆర్ట్స్ కళాశాల నుండి గన్ పార్కు అమరవీరుల స్థూపం వరకు ర్యాలీ తలపెట్టిన విషయం తెలిసిందే. విద్యార్థుల ర్యాలీ ఉదయం గన్ పార్కుకు ప్రారంభమైంది. శాంతియుతంగా ర్యాలీ నిర్వహిస్తున్న విద్యార్థులను పోలీసులు ఎన్‌సిసి గేటు వద్ద అడ్డుకున్నారు. విద్యార్థులను ముందుకు వెళ్లడానికి అనుమతించలేదు. దీంతో విద్యార్థులు పోలీసులతో వాగ్వాదానికి దిగారు. తమను ర్యాలీకి అనుమతించాలని డిమాండ్ చేశారు. దీంతో పోలీసులకు, విద్యార్థులకు మధ్య తీవ్ర తోపులాట జరిగింది. విద్యార్థులు పోలీసుల పైకి రాళ్లు రువ్వారు. పోలీసులు టియర్ గ్యాస్ ప్రయోగించి విద్యార్థులను చెదరగొట్టే ప్రయత్నం చేశారు.

కాగా తెలుగుదేశం పార్టీ తెలంగాణ శాసనసభ్యులు పలువురు రాజ్ భవన్ ఎదుట మెరుపు ధర్నాకు దిగారు. తెలంగాణ ప్రాంతంలో ఉన్న కేంద్ర బలగాలను వెంటనే ఉపసంహరించాలని వారు డిమాండ్ చేశారు. తెలంగాణలో కేంద్ర బలగాలను మోహరించి అత్యవసర పరిస్థితిని తలపిస్తున్నారని ఆరోపించారు. జై తెలంగాణ అంటూ నినాదాలు చేశారు.

Published On July 6, 2011