డిఎంకెతో పొత్తు కొనసాగుతుంది: ప్రణబ్ ముఖర్జీ

By Pratap

Published: Saturday, July 9, 2011, 14:32 [IST]

చెన్నై: మాజీ ముఖ్యమంత్రి కరుణానిధి నాయకత్వంలోని డిఎంకెతో కాంగ్రెసు పొత్తు కొనసాగుతుందని కేంద్ర ఆర్థిక మంత్రి ప్రణబ్ ముఖర్జీ స్పష్టం చేశారు. కేంద్ర మంత్రి పదవికి దయానిధి మారన్ రాజీనామా చేసిన నేపథ్యంలో ప్రణబ్ ముఖర్జీ శనివారం కరుణానిధితో సమావేశమయ్యారు. సోమవారం మంత్రి వర్గ విస్తరణ జరుగుతుందని వార్తలు వెలువడుతున్న నేపథ్యంలో కూడా ఈ భేటీకి ప్రాధాన్యం ఏర్పడింది.

డిఎంకె, కాంగ్రెసు మధ్య పొత్తుపై ఊహాగానాలు అవసరం లేదని, రెండు పార్టీలు కలిసి సాగుతాయని, ఈ బంధం మరింత పటిష్టమవుతుందని కరుణానిధితో భేటీ అనంతరం ప్రణబ్ మీడియా ప్రతినిధులతో అన్నారు. ఏప్రిల్‌లో శానససభ ఎన్నికలు ముగిసిన తర్వాత ఇది తన మూడో చెన్నై పర్యటన అని, తాజా రాజకీయాలపై కరుణానిధికి వివరించేందుకు ఈ పర్యటనను వాడుకున్నానని ఆయన అన్నారు.

ఎ. రాజా, దయానిధి మారన్ స్థానాల్లో డిఎంకె నుంచి ఎవరిని మంత్రివర్గంలోకి తీసుకోవాలనే విషయంపై ప్రణబ్ ముఖర్జీ కరుణానిధితో మాట్లాడినట్లు సమాచారం. యుపిఎ మంత్రివర్గంలో ప్రస్తుతం డిఎంకెక చెందిన అళగిరి మాత్రమే ఉన్నారు. కరుణానిధి కూతురు, రాజ్యసభ సభ్యురాలు కనిమొళి అరెస్టు తర్వాత ఇదే తొలి ఉన్నత స్థాయి సమావేశం కావడం విశేషం.

Published On July 9, 2011