తెలంగాణ సాధనే లక్ష్యం: టి-కాంగ్రెసు దీక్ష

హైదరాబాద్: తెలంగాణ రాష్ట్రం సాధించాలనే లక్ష్యంతో టి-కాంగ్రెసు ప్రజాప్రతినిధుల 48 గంటల నిరాహార దీక్ష బుధవారం ఉదయం 10 గంటలకు హైదరాబాదులోని ఇందిరాపార్కు వద్ద ప్రారంభమయింది. ఈ నిరాహారదీక్షలో రాజ్యసభ సభ్యుడు కె కేశవరావు, పార్లమెంటు సభ్యులు పొన్నం ప్రభాకర్, కోమటిరెడ్డి రాజగోపాల్, గుత్తా సుఖేందర్ రెడ్డి, రాజయ్య, వివేక్ మంత్రులు జానారెడ్డి, బస్వరాజు సారయ్య, మాజీ మంత్రి జూపల్లి కృష్ణారావు, ఎమ్మెల్యేలు దామోదర రెడ్డి, బిక్షమయ్య గౌడ్, కూన శ్రీశైలం గౌడ్, ఉత్తమ్ కుమార్ రెడ్డి, ముత్యంరెడ్డి తదితరుల 27 మంది ప్రజాప్రతినిధులు హాజరయ్యారు. దీక్షకు భారీగా తెలంగాణవాదులు తరలి వచ్చారు. ఈ సందర్భంగా నేతలు మీడియాతో మాట్లాడారు.

తాము శాంతియుతంగానే తెలంగాణ సాధించాలనే లక్ష్యంతో ముందుకు వెళుతున్నామని అన్నారు. కేంద్ర మంత్రి, రాష్ట్ర వ్యవహారాల ఇంచార్జ్ గులాం నబీ ఆజాద్ వ్యాఖ్యలను వారు ఖండించారు. ఆజాద్ విదేశీ పర్యటనలో ఉన్నారని ఆయన వచ్చిన తర్వాత మాట్లాడతామని చెప్పారు. ఆయన మాటలు అర్థరహితమన్నారు. తాము ఎలాంటి ప్యాకేజీలకు ఒప్పుకునేది లేదని తెలంగాణ రాష్ట్రానికే కట్టుబడతామని చెప్పారు. తెలంగాణ ప్రకటించకుంటే ప్రజలు తిరగబడే రోజు వస్తుందని హెచ్చరించారు. తెలంగాణ ప్రకటించే వరకు రాజీనామాలు వెనక్కి తీసుకోమని స్పష్టం చేశారు.

English summary

Telangana congress leaders starts their 48 hours fast today morning 10'O clock at indira park.