అందుకే తెలంగాణవాళ్లు రెచ్చిపోతున్నారు: టిజి

By Pratap

Published: Saturday, July 16, 2011, 14:41 [IST]

విజయవాడ: తెలంగాణవాదులపై సీమాంధ్రకు చెందిన మంత్రి టిజి వెంకటేష్ ధ్వజమెత్తారు. రాజధాని హైదరాబాదు తమ ప్రాంతంలో ఉందనే తెలంగాణవాళ్లు రెచ్చిపోతున్నారని ఆయన అన్నారు. విజయవాడలో శనివారం ఏర్పాటైన సమైక్యాంధ్ర రౌండ్ టేబుల్ సమావేశం సందర్భంగా ఆయన ఆంధ్రుల హక్కుల ఐక్య వేదికను ప్రారంభించారు. తెలంగాణలోని హైదరాబాద్ రాజధాని కావడం వల్లనే తెలంగాణవాళ్లు రెచ్చిపోతున్నారని, కోస్తా, రాయలసీమల్లో కూడా రాజధానులు పెట్టాలని తాము డిమాండ్ చేయడం అవసరమని ఆయన అన్నారు.

కేవలం సమైక్యాంధ్ర అంటే సరిపోదని, రాయలసీమ, ఆంధ్ర ప్రాంతాలు తమ హక్కుల కోసం కూడా పోరాటం చేయాలని ఆయన అన్నారు. రాష్ట్రాన్ని సమైక్యంగా ఉంచాలని డిమాండ్ చేస్తున్నామని ఆయన చెప్పారు. తాము రాయలసీమ హక్కుల కోసం పోరాటం చేస్తున్నామని, ఆంధ్రుల హక్కుల ఐక్యవేదిక కూడా అటువంటి పోరాటం చేయాలని ఆయన అన్నారు. రాష్ట్రాన్ని సమైక్యంగా ఉంచడానికి తాము ఎటువంటి త్యాగాలకైనా సిద్ధమని మరో సీమాంధ్ర మంత్రి శైలజనాథ్ అన్నారు.

Published On July 16, 2011