వెనక్కి తగ్గిన ఆజాద్: ఢిల్లీకి తెలంగాణ నేతలు

By Srinivas

Published: Tuesday, July 19, 2011, 16:37 [IST]

హైదరాబాద్: కేంద్ర మంత్రి, రాష్ట్ర వ్యవహారాల ఇంచార్జి గులాం నబీ ఆజాద్ వెనక్కి తగ్గడంతో తెలంగాణ కాంగ్రెసు పార్టీ ప్రజా ప్రతినిధులు న్యూఢిల్లీ వెళ్లి అధిష్టానంతో చర్చించేందుకు మంగళవారం సిద్ధమయ్యారు. చైనాలో రాజధాని బీజింగులో ఆజాద్ చేసిన వ్యాఖ్యలపై వారు మండిపడ్డ విషయం తెలిసిందే. అయితే తాను తెలంగాణపై ఎలాంటి వ్యతిరేక వ్యాఖ్యలు చేయలేదని, మీడియానే తన వ్యాఖ్యలను వక్రీకరించిందని రాజ్యసభ సభ్యుడు కె కేశవరావు, మంత్రి జానారెడ్డికి స్వయంగా ఫోన్ చేసి చెప్పడంతో టి-కాంగ్రెసు నేతలు ఢిల్లీ వెళ్లేందుకు నిర్ణయించుకున్నారు. మంత్రి జానారెడ్డి నివాసంలో వారు భేటీ అయ్యారు. ఈ నెల 21న లేదా 22న ఢిల్లీ వెళ్లాలని నిర్ణయించుకున్నారు.

ఆర్టికల్ 3ను సీమాంధ్రులు వక్రీకరిస్తున్నారని ఎంపీ గుత్తా సుఖేందర్ రెడ్డి అన్నారు. తెలంగాణపై ప్రకటన రాలేదన్న సీమాంధ్ర ప్రజాప్రతినిధులు డిసెంబర్ 9 ప్రకటనను ఎలా అర్థం చేసుకుంటున్నారని ప్రశ్నించారు. తెలంగాణపై అధిష్టానం నుండి ఖచ్చితమైన హామీ వస్తే రాజీనామాలు ఉపసంహరించుకునే విషయాన్ని పరిశీలిస్తామని చెప్పారు. తెలంగాణ ప్రక్రియ కోసమే చర్చలు అన్నారు. ఆజాద్ ఒకటి రెండు రోజుల్లో చైనాలో చేసిన వ్యాఖ్యలపై వివరణ ఇస్తారని చెప్పారు. ప్రధానికి సీమాంధ్రులు ఇచ్చిన నివేదికలో అన్ని అవాస్తవాలే అన్నారు. కాగా తెలంగాణ కాంగ్రెసు నేతలకు అధిష్టానం నుండి పలుమార్లు పిలుపు వచ్చినప్పటికీ ఆజాద్ తన వ్యాఖ్యలను ఉపసంహరించుకుంటేనే చర్చలకు వెళతామని పట్టుబట్టిన విషయం తెలిసిందే.

Published On July 19, 2011