సీమాంధ్రులు తెలంగాణకు త్యాగం చేశారు: కోడెల

By Srinivas

Published: Wednesday, July 20, 2011, 15:30 [IST]

గుంటూరు: సీమాంధ్ర ప్రజలు తెలంగాణకు రాజధానిని, హైకోర్టును త్యాగం చేశారని తెలుగుదేశం పార్టీ సీనియర్ నాయకుడు కోడెల శివప్రసాద్ బుధవారం అన్నారు. సమైక్యాంధ్రను కోరుతూ గుంటూరులో తెలుగుదేశం పార్టీ సీమాంధ్ర ప్రజాప్రతినిధులు భేటీ ఆయ్యారు. ఈ భేటీలో 12 మంది ఎమ్మెల్యేలు, ఇద్దరు ఎమ్మెల్సీలు, ఇద్దరు ఎంపీలు పాల్గొన్నారు. ఈ సందర్భంగా కోడెల మాట్లాడుతూ తెలంగాణ రాష్ట్ర సమితి అధ్యక్షుడు కల్వకుంట్ల చంద్రశేఖర రావు ప్రాంతాల పేరుతో ప్రజల మధ్య విద్వేషాలు రెచ్చగొడుతున్నారని ఆరోపించారు. కర్నూలు, గుంటూరు పట్టణాలను రాజధానిగా కోల్పోయిందన్నారు.

కెసిఆర్ సమైక్యవాది అయినప్పటికీ రాజకీయ స్వార్థంతో తెలంగాణ వాదిగా మారారని అన్నారు. సమైక్యాంధ్ర కోసం ఎలాంటి ప్రాణత్యాగానికైనా సిద్ధమన్నారు. రాజకీయ నిరుద్యోగులే ప్రాంతీయ విద్వేషాలు రెచ్చగొడుతున్నారని అన్నారు. సమైక్యాంధ్ర చారిత్రక అవసరం అని మరో సీనియర్ అశోక్ గజపతి రాజు అన్నారు. గతంలో ప్రతిపక్షం రాష్ట్రాలు కోరేవని ఇప్పుడు అధికార పక్షం వారు కోరుతున్నారని అన్నారు. ఇదో పెద్దజబ్బులా తయారయిందన్నారు. విభజన ఎట్టి పరిస్థితుల్లోనూ సాధ్యం కాదని వర్ల రామయ్య అన్నారు. రాష్ట్రాన్ని ముక్కలు చేయమని కేంద్రం ప్రకటించాలని డిమాండ్ చేశారు.

Published On July 20, 2011