యాదిరెడ్డి అంత్యక్రియల్లో ఏడ్చేసిన హరీష్, కోదండరామ్

By Srinivas

Published: Friday, July 22, 2011, 12:28 [IST]

హైదరాబాద్: తెలంగాణ రాష్ట్ర సమితి సిద్దిపేట శాసనసభ్యుడు హరీష్ రావు, తెలంగాణ ఐక్య కార్యాచరణ సమితి చైర్మన్ ఆచార్య కోదండరామ్ శుక్రవారం కన్నీళ్లు పెట్టుకున్నారు. ప్రత్యేక తెలంగాణ రాష్ట్రం కోసం న్యూఢిల్లీ పార్లమెంటు భవనం సమీపంలో ఆత్మహత్యకు పాల్పడిన యాదిరెడ్డి అంతిమయాత్రకు హాజరైన పలువురు తెలంగాణవాదులు కన్నీళ్లు పెట్టుకున్నారు. శుక్రవారం రంగారెడ్డి జిల్లా మొయినాబాద్‌లో యాదిరెడ్డి అంత్యక్రియలు ప్రారంభించారు. ఈ సందర్భంగా హరీష్ రావు కన్నీళ్లతో మాట్లాడారు. హరీష్ రావు మాట్లాడిన తీరు అందరిని కన్నీటి పర్యంతం చేసింది. తెలంగాణ కోసం యాదిరెడ్డి 13 పేజీల లేఖను రాశారని చెప్పారు.

ఆత్మహత్య చేసుకోవడానికి ముందు ఇంటికి వెళితే తల్లిని, చెల్లిని చూసి తన లక్ష్యం మారుతుందో అనే భావనతో యాదిరెడ్డి ఇంటికి రాకుండానే పార్లమెంటు భవనంకు వెళ్లి ఆత్మహత్య చేసుకున్నారని చెప్పారు. సీమాంధ్ర పెట్టుబడిదారులు అయిన లగడపాటి రాజగోపాల్ వంటి నేతలకు తెలంగాణ విద్యార్థులు, యువకులు ఆత్మహత్య చేసుకున్నప్పటికీ మనసు ఎందుకు కరగడం లేదని ప్రశ్నించారు. అంత్యక్రియల కార్యక్రమంలో ఈటెల రాజేందర్, విమలక్క, గద్దర్, దేవేందర్ గౌడ్ తదితరులు పాల్గొన్నారు.

Published On July 22, 2011