మీరు వైదొలగండి, తెలంగాణ వస్తుంది: జీవన్ రెడ్డి

By Srinivas

Published: Tuesday, July 26, 2011, 15:32 [IST]

హైదరాబాద్: ప్రత్యేక తెలంగాణ రాష్ట్రం సాధించాలంటే రాష్ట్ర ప్రభుత్వంలో ఉన్న మంత్రులు సైతం ప్రభుత్వం నుండి వైదొలగారని కాంగ్రెసు పార్టీ సీనియర్ నేత, మాజీ మంత్రి జీవన్ రెడ్డి మంగళవారం అన్నారు. ప్రభుత్వం నుండి మంత్రులు వైదొలగితే తెలంగాణ రాష్ట్రం తప్పకుండా వస్తుందన్నారు. మంత్రులు రాజీనామాలు చేయడం వల్ల ప్రభుత్వం నడవదని అప్పుడు అధిష్టానానికి తెలంగాణ రాష్ట్ర సెంటిమెంటు తీవ్రత అర్థమవుతుందని సూచించారు. సమస్య మన వద్ద పెట్టుకొని మరెవరినో ప్రశ్నించి లాభం లేదన్నారు. కేంద్ర మంత్రి గులాం నబీ ఆజాద్ చర్చల పేరుతో జాప్యం చేస్తున్నారని ఆరోపించారు. రాజీనామాలు తిరస్కరించడం వెనుక ఆజాద్ హస్తం లేదంటే నమ్మేంత అమాయకులం కాదన్నారు.

ఎమ్మెల్యేలు అసెంబ్లీకి, మంత్రులు సచివాలయానికి వెళ్లడం మానేస్తే తెలంగాణ రాక పోదన్నారు. ముఖ్యమంత్రి కిరణ్ కుమార్ రెడ్డికి కాంగ్రెసు ప్రతిష్ట పెంచే ఆలోచన ఏమాత్రం ఉన్నట్లుగా కనిపించడం లేదన్నారు. ఆయన ప్రభుత్వాన్ని కాపాడుకోవడంలోనే శ్రద్ధ చూపిస్తున్నారని ఆరోపించారు. ఎవరైనా కలిసి ఉండటానికి ఏకాభిప్రాయం కావాలి. కానీ విడిపోవడానికి ఎందుకని ప్రశ్నించారు. నాలుగు కోట్ల ప్రజల సెంటిమెంటును గౌరవించి తెలంగాణ ప్రకటిస్తే కాంగ్రెసుకు క్రెడిట్ దక్కుతుందన్నారు. రాజీనామాలు తిరస్కరించడం ద్వారా తెలంగాణ ప్రజల మనోభావాలను చులకన చేశారన్నారు. రాష్ట్రంలో 285 మంది ఎమ్మెల్యేలు తెలంగాణవాదంపై గెలిచారని ఇంతకన్నా ఏకాభిప్రాయం ఎవరికి కావాలని ప్రశ్నించారు.

Published On July 26, 2011