తెలంగాణ చర్చలు కోర్ కమిటీకి నివేదిస్తా: ఆజాద్

న్యూఢిల్లీ: తెలంగాణపై ఇరు ప్రాంతాల నేతల వాదనలను తమ పార్టీ కోర్ కమిటీకి నివేదిస్తానని కాంగ్రెసు ఆంధ్రప్రదేశ్ వ్యవహారాల ఇంచార్జీ గులాం నబీ ఆజాద్ చెప్పారు. తెలంగాణ ప్రాంత ప్రతినిధులతో చర్చలు జరిపిన అనంతరం ఆయన బుధవారం మీడియా ప్రతినిధులతో మాట్లాడారు. తెలంగాణ నేతలతో పార్లమెంటు సమావేశాల సందర్భంగా మరోసారి మాట్లాడనున్నట్లు ఆయన తెలిపారు. తెలంగాణ నేతలతో ప్రాథమిక చర్చలు పూర్తయ్యాయని, ఇక సీమాంధ్ర నేతలతో చర్చలు జరుపుతానని, పరిమిత ప్రతినిధి బృందంతోనే చర్చలుంటాయని ఆయన అన్నారు. సీమాంధ్ర నేతలతో వచ్చే నెల 10వ తేదీన ఆజాద్ చర్చలు జరపనున్నారు.

కాగా, మోసపూరిత ప్రకటనలు చేయవద్దని, సీమాంధ్ర నేతల అభిప్రాయాలతో సంబంధం లేదని, తెలంగాణ రాష్ట్రాన్ని ఏర్పాటు చేయాల్సిందేనని తెలంగాణ నేతలు ఆజాద్‌తో చెప్పారు. చర్చలు జరిగిన తీరు పట్ల మంత్రి జె. గీతారెడ్డి సంతృప్తి వ్యక్తం చేశారు. తెలంగాణపై సానుకూల నిర్ణయం వస్తుందని ఆశిస్తున్నట్లు ఆమె తెలిపారు. మంత్రులు, శాసనసభ్యులు, ఎమ్మెల్సీలు విధులకు హాజరయ్యే విషయంపై పార్లమెంటు సభ్యులతో చర్చించిన తర్వాత నిర్ణయం తీసుకుంటామని ఆయన అన్నారు. హైదరాబాద్‌, జలవనరులపై తాము ఆజాద్‌తో మాట్లాడినట్లు పార్లమెంటు సభ్యుడు కోమటిరెడ్డి రాజగోపాల్ రెడ్డి చెప్పారు. హైదరాబాద్ చరిత్ర, జనాభా, రెవెన్యూ, గ్రేటర్ హైదరాబాద్ మార్పు విషయాలపై తాము ఆజాద్‌కు వివరించినట్లు ఆయన తెలిపారు.

English summary

Congress AP affairs incharge Ghulam nabi Azad said that he present the arguments of Seemandhra and Telangana leaders to party core committee.