వెంటనే తప్పుకోవాలని యడ్యూరప్పకు బిజెపి ఆదేశం

న్యూఢిల్లీ: కర్నాటక సంక్షోభానికి తెరదించే ప్రయత్నాలకు భారతీయ జనతా పార్టీ అధిష్టానం చర్యలు ప్రారంభించింది. లోకాయుక్త నివేదిక నేపథ్యంలో ముఖ్యమంత్రి యడ్యూరప్పను పీఠంపై నుండి దిగి పోవాల్సిందిగా అధిష్టానం ఆదేశాలు జారీ చేసింది. కొత్త ముఖ్యమంత్రిని ఎన్నికునే బాధ్యతలను మాజీ కేంద్ర మంత్రి అరుణ్ జైట్లీ, మాజీ పార్టీ సారథి రాజ్‌నాథ్ సింగ్‌లకు పార్టీ అప్పగించింది. కొత్త ముఖ్యమంత్రులను శుక్రవారం లోగా ఎంపిక చేయాలని వారికి సూచించింది. కర్నాటక సంక్షోభానికి తెరదించేందుకు గురువారం ఉదయం బిజెపి కోర్ కమిటీ న్యూఢిల్లీలో సమావేశం అయింది. ఈ సమావేశంలో యెడ్డీని తొలగించాలని, శుక్రవారం బిజిపి శాసనసభా పక్షాన్ని సమావేశ పరిచి కొత్త ముఖ్యమంత్రిని ఎన్నిక చేయాలని నిర్ణయించుకుంది. పరిశీలకులుగా రాజ్‌నాథ్, జైట్లీ ఉంటారు.

కాగా కర్నాటకలో ముఖ్యమంత్రి యడ్యూరప్ప రహస్య ప్రదేశంలో కొందరు మంత్రులు, శాసనసభ్యులతో కలిసి భేటీ నిర్వహిస్తున్నట్టుగా సమాచారం. లోకాయుక్తకు జడిసి తాను ముఖ్యమంత్రి పీఠంపై నుండి వైదొలగేది లేదని ఆయన అధిష్టానంకు తేల్చి చెప్పారు. అయితే తప్పని సరి పరిస్థితుల్లో వైదొలగవలసి వస్తే తాను సూచించిన వ్యక్తినే పీఠంపై కూర్చుండ బెట్టాలని కూడా ఆయన అధిష్టానానికి సూచించినట్లుగా తెలుస్తోంది. అయితే కర్నాటకలో యెడ్డీ సామాజిక వర్గం ప్రాధాన్యత నేపథ్యంలో ఆయనతో విభేదాలు తెచ్చుకోలేక అధిష్టానం ఆయన సూచించి వారి పేరునే ఖరారు చేసే అవకాశం కనిపిస్తోంది.

English summary

BJP high command decided to call back CM Yeddyurappa and they will elect new CM on friday.