తెలంగాణకు 4కళ్ల చంద్రబాబే విలన్: పొంగులేటి

హైదరాబాద్: ప్రత్యేక తెలంగాణ రాష్ట్ర సాధనకు తెలుగుదేశం పార్టీ అధినేత చంద్రబాబు నాయుడే అతి పెద్ద విలన్ అని శాసన మండలి సభ్యుడు పొంగులేటి సుధాకర్ రెడ్డి శుక్రవారం విలేకరుల సమావేశంలో ఆరోపించారు. గత 2009లో కేంద్రం తెలంగాణ రాష్ట్రం ప్రకటిస్తే మొదట అడ్డుకున్నది టిడిపి నేతలే అని విమర్శించారు. ప్రస్తుతం చంద్రబాబు తెలంగాణపై నాలుగు కళ్ల సిద్దాంతంతో ముందుకు వస్తున్నారన్నారు. చంద్రబాబు ఇప్పటికైనా స్పష్టమైన వైఖరితో ముందుకు రావాలన్నారు. 2011 తీర్మానానికే టిడిపి కట్టుబడి ఉందన్న మాజీ మంత్రి, టిడిపి నేత యనమల రామకృష్ణుడు వ్యాఖ్యలపై చంద్రబాబు స్పందించాలని డిమాండ్ చేశారు.

కాంగ్రెసు పార్టీపై బురద జల్లడానికి బదులు టిడిపి ముందు ఖచ్చితమైన వైఖరి ప్రకటించాలని అన్నారు. టిడిపి ముందుకొస్తే తాము అధిష్టానాన్ని ఒప్పించి తెలంగాణ రాష్ట్రాన్ని తీసుకు వస్తామని చెప్పారు. తెలంగాణ అడ్డుకోవడానికి కుట్ర జరుగుతున్నదని ఆయన అనుమానం వ్యక్తం చేశారు. తెలంగాణ ఉద్యమం తీవ్ర స్థాయిలో ఉన్న ఈ సమయంలో మంత్రి టిజి వెంకటేష్ గ్రేటర్ రాయలసీమ అని, కేంద్ర మంత్రి కిషోర్ చంద్రదేవ్ మన్య సీమ అని కొత్తగా ప్రతిపాదనలు తీసుకు వస్తున్నారని ఆరోపించారు. అయితే వారు తమ అభిప్రాయం చెప్పుకోడంలో తప్పులేదన్నారు.

English summary

MLC Ponguleti Sudhakar Reddy blamed TDP chief Chandrababu Naidu for Telangana. He said Babu is main villain. He suspected that manya seema and greater Rayalaseema is Seemandhra leaders strategy.