వైయస్ జగన్‌కు అదో మంచి వేదిక: శైలజానాథ్

By Srinivas

Published: Friday, July 29, 2011, 12:06 [IST]

హైదరాబాద్: వైయస్సాఆర్ కాంగ్రెసు పార్టీ అధ్యక్షుడు వైయస్ జగన్మోహన్ రెడ్డికి తన నిజాయితీ నిరూపించుకోవడానికి సిబిఐ రూపంలో ఓ మంచి వేదిక దొరికిందని మంత్రి శైలజానాథ్ శుక్రవారం అన్నారు. తన కంపెనీల పెట్టుబడులలో ఎలాంటి అక్రమాలు జరగలేదని నిరూపించుకోవడం ద్వారా జగన్ తన విశ్వసనీయతను బహిర్గతం చేయాలని సూచించారు. గనులు, ధనం కన్నా మనిషికి మానవ సంబంధాలు మిన్న అని అన్నారు. రాష్ట్రంలో తెలుగుదేశం, కాంగ్రెసు రెండు పార్టీలే ప్రధానమైనవని అన్నారు. తెలంగాణ రాష్ట్ర సమితి ప్రజలను రెచ్చగొట్టే వ్యాఖ్యలు చేస్తోందని ఆరోపించారు.

ప్రత్యేక తెలంగాణ డిమాండుతో పాటు ప్రత్యేక రాయలసీమ, మన్యసీమ డిమాండ్లు సైతం ఎప్పటి నుండో ఉన్నాయని చెప్పారు. అయినప్పటికీ రాష్ట్రంలో మెజార్టీ ప్రజలు సమైక్యాంధ్రనే కోరుకుంటున్నారని చెప్పారు. గ్రేటర్ హైదరాబాదు మున్సిపాలిటీ పరిధిలో 50 లక్షల వరకు సీమాంధ్ర ప్రజలు ఉన్నారని గణాంకాలు చెబుతుండగా తెలంగాణ నేతలు మాత్రం అంతకంటే చాలా తక్కువగా ఉన్నారని అబద్దాలు చెప్పడం ఎంత వరకు సమంజసం అని ప్రశ్నించారు. తెలంగాణ నేతలు అబద్దాలు చెప్పటం మానుకోవాలని సూచించారు.

Published On July 29, 2011