సమైక్యాంధ్ర కోసం అవమానాలు భరిస్తాం: సోమిరెడ్డి

By Pratap

Published: Saturday, July 30, 2011, 17:41 [IST]

హైదరాబాద్: సమైక్యాంధ్ర రాష్ట్రం కోసం తాము ఎన్ని అవమానాలనైనా భరిస్తామని తెలుగుదేశం సీమాంధ్ర నాయకుడు సోమిరెడ్డి చంద్రమోహన్ రెడ్డి అన్నారు. తెలంగాణ ఉద్యోగులు తీవ్రవాదుల మాదిరిగా మాట్లాడుతున్నారని, సకల జన సమ్మెలో సీమాంధ్ర ఉద్యోగులు పాల్గొనకపోతే దాడులు చేస్తామని హెచ్చరించడం సరి కాదని ఆయన శనివారం మీడియా ప్రతినిధుల సమావేశంలో అన్నారు. హైదరాబాదులో సీమాంధ్రులు పెట్టుబడులు పెట్టారని, అందుకే తెలంగాణను వ్యతిరేకిస్తున్నారనే మాటలో నిజం లేదని ఆయన అన్నారు. హైదరాబాదులో తమ పెట్టుబడులు లేవని ఆయన స్పష్టం చేశారు.

కాంగ్రెసు పార్లమెంటు సభ్యులు కావూరి సాంబశివరావు, లగడపాటి రాజగోపాల్, రాయపాటి సాంబశివ రావు హైదరాబాదులో పెట్టుబడులు పెట్టినంత మాత్రాన సీమాంధ్రులంతా పెట్టారని అనడం సరి కాదని ఆయన అన్నారు. ముఖ్యమంత్రులంతా హైదరాబాదునే అభివృద్ధి చేశారని ఆయన అన్నారు. హైదరాబాదు తెలుగువాళ్ల రాజధాని అని, ఆంధ్రుల రాజధాని అని ఆయన అన్నారు. తెలుగువాళ్లంతా పన్నులు చెల్లిస్తేనే హైదరాబాదు అభివృద్ధి చెందిందని ఆయన అన్నారు.

Published On July 30, 2011