రాజీనామాల పేరుతో రాజీ డ్రామాలు: హరీష్‌ రావు

హైదరాబాద్‌: తెలంగాణ ప్రాంత కాంగ్రెసు, తెలుగుదేశం పార్టీ ప్రజా ప్రతినిధులు రాజీనామాల పేరుతో వారి వారి అధిష్టానాలతో రాజీ డ్రామాలు ఆడుతున్నారని సిద్దిపేట తెలంగాణ రాష్ట్ర సమితి శాసనసభ్యుడు హరీష్ రావు ఆదివారం విమర్శించారు. హైదరాబాదు ప్రెస్ క్లబ్‌లో జరిగిన కందెన మాసపత్రిక తొలి సంచిక ఆవిష్కరణ కార్యక్రమానికి ఆయన హాజరయ్యారు. రెండోసారి తాము మళ్లీ రాజీనామాలు చేసినప్పటికీ తెదేపా, కాంగ్రెస్‌ ఎమ్మెల్యేలు, ఎంపీలు ఎందుకు చేయటం లేదని ఆయన ప్రశ్నించారు. ఈ కార్యక్రమంలో పలు ప్రజాసంఘాలు, పార్టీ నేతలు పాల్గొన్నారు.

ప్రజల కోణంలో కాకుండా రాజకీయ కోణంలో పార్టీల నేతలు చూస్తుండటం వల్లే ప్రత్యేక రాష్ట్రం రావటం లేదని తెదేపా సీనియర్‌ నేత కడియం శ్రీహరి అన్నారు. పార్టీని సంక్షోభం నుంచి గట్టెక్కించ్చేందుకు ఆజాద్‌ చర్చలు జరుపుతున్నారే తప్ప తెలంగాణ ఇవ్వటం కోసం కాదని, ఈ విషయాన్ని ఆ ప్రాంత కాంగ్రెస్‌ నేతలు గుర్తించాలని భారతీయ జనతా పార్టీ సీనియర్‌ నేత లక్ష్మణ్‌ సూచించారు. ప్రత్యేక రాష్ట్ర అంశంలో స్పష్టమైన వైఖరితో వచ్చే పార్టీలతో కలిసి పనిచేస్తామని ఆయన స్పష్టం చేశారు.

కాగా తెలంగాణ కాంగ్రెసు పార్టీ ఎంపీలు రాజీనామాలపై వెనక్కి తగ్గవద్దని టిఆర్ఎస్ మాజీ ఎంపీ వినోద్ కుమార్ కరీంనగర్‌లో అన్నారు. ఎంపీలు రాజీనామాలపై వెనక్కి తగ్గకుండా ఉంటే తెలంగాణ ప్రజలు వారిని బ్రహ్మాండమైన ఆధిక్యంతో గెలిపించి తెలంగాణ సభ్యులుగా పార్లమెంటుసు పంపిస్తారని అన్నారు. ఉద్యోగ సంఘాల సమ్మె కారణంగా తెలంగాణ వస్తుందని ఆయన అభిప్రాయపడ్డారు.

English summary

TRS MLA Harish Rao blamed Telugudesam and Congress party on Telangana issue.