కామన్‌వెల్త్‌ స్కామ్, షీలా దీక్షిత్‌పై తీవ్ర దుమారం

హైదరాబాద్: కామన్‌వెల్త్ క్రీడల కుంభకోణంలో ఢిల్లీ ముఖ్యమంత్రి షీలా దీక్షిత్‌పై తీవ్ర దుమారం చెలరేగుతోంది. కాగ్ నివేదిక ఆమెను తప్పు పట్టిన నేపథ్యంలో ప్రతిపక్ష బిజెపి ఆమెపై కత్తులు నూరుతోంది. షీలా రాజీనామా చేయాలని బిజెపి డిమాండ్‌ చేసింది. నిరాకరిస్తే పార్టీయే తొలగించాలని సూచించింది. సీబీఐ ఢిల్లీ సీఎం అక్రమాలపైనా దర్యాప్తు జరపాలని బిజెపి అధికార ప్రతినిధి రవిశంకర్‌ ప్రసాద్‌ డిమాండ్‌ చేశారు. కామన్‌వెల్త్‌ క్రీడల ఖర్చును మంత్రివర్గం సమష్ఠిగా ఆమోదించిందని, వారందర్నీ బాధ్యుల్ని చేయాలని అన్నారు.

కాగ్‌ నివేదిక తనకు ఇంకా నివేదిక అందలేదని, నివేదికపై పార్లమెంటు ప్రజాపద్దుల సంఘం విచారణ సమయంలో రాష్ట్ర ప్రభుత్వం పూర్తిగా సహకరిస్తుందని షీలా దీక్షిత్ చెప్పారు. షీలా రాజీనామా చేయాల్సిన అవసరం లేదని, కర్ణాటక లోకాయుక్త నివేదికతో కాగ్‌ను పోల్చలేమని కేంద్ర న్యాయమంత్రి సల్మాన్‌ ఖుర్షీద్‌ అన్నారు. నివేదిక పార్లమెంటు ముందు ఉందని, నిర్ణయం తీసుకొనే అవకాశం దానికి ఇవ్వాలని సూచించారు.

ఢిల్లీ ప్రభుత్వం మీద కాగ్ వ్యాఖ్యలు ఇవి -

- వీధి దీపాలకు రూ.30.07 కోట్లు అదనంగా ఖర్చు పెట్టారు. దిగుమతి చేసుకున్న సంస్థ ఇన్వాయిస్‌ పట్టికతో పోలిస్తే చాలా ఎక్కువ ధర పెట్టినట్లు తెలుస్తోంది.

- క్రీడా ప్రాంగణాల దగ్గర తాత్కాలిక పద్ధతిన వీధుల సుందరీకరణకు కిలోమీటర్‌కు రూ.4.8 కోట్లు చొప్పున రూ.101.02 కోట్లు ఖర్చు పెట్టారు. పాదర్శకత లేకుండా కన్సల్టెంటుకే పని అప్పగించారు.

- ఏడేళ్లపాటు అత్యవసర సేవల కమ్యూనికేషన్‌ నెట్‌వర్క్‌ నిర్వహణకు 99.81 కోట్లతో కాంట్రాక్టు ఇచ్చారు. దీని అవసరమే లేదు.

English summary

The CAG findings immediately shot up the political temperature with the BJP demanding Dikshits resignation, and the CM herself calling a press conference only to say that she would answer all the charges only when the Parliamentary Accounts Committee (PAC) examines the CAG report.