ఇటలీ వనితను మెప్పించడానికేనా?: ప్రధానికి రేవంత్‌రెడ్డి

By Srinivas

Published: Sunday, August 7, 2011, 14:59 [IST]

హైదరాబాద్: ఇటలీ వనితను మెప్పించడానికో, పదవి ఇచ్చిన వారిని ఒప్పించడానికే ప్రధాన మంత్రి మన్మోహన్ సింగ్ దృతరాష్ట్రుడిగా వ్యవహరిస్తున్నారని తెలుగుదేశం పార్టీ శాసనసభ్యుడు రేవంత్ రెడ్డి ఆదివారం విమర్శించారు. దేశంలో ప్రధాని, రాష్ట్రంలో కిరణ్ కుమార్ రెడ్డి పాలన అచేతనావస్థలో ఉందన్నారు. తెలంగాణ, 14ఎఫ్ తదితర విషయాల్లో కాంగ్రెసు పార్టీ మరోసారి తెలంగాణ ప్రజలను మోసం చేసే ప్రయత్నాలు చేస్తోందని ఆరోపించారు. తెలంగాణ విద్యార్థులు మోసం చేయడానికి పార్లమెంటును తప్పుదారి పట్టించిన కేంద్రమంత్రి చిదంబరంపై సభా హక్కుల ఉల్లంఘన నోటీసు ఇచ్చి మంత్రి పదవి నుండి తొలగించాలని డిమాండ్ చేశారు.

కిరణ్ కుమార్ రెడ్డి ప్రభుత్వం 14ఎఫ్ పై కళ్లులేని కబోదిలా ఉందన్నారు. తెలంగాణపై ప్రధానమంత్రి కళ్లు తెరిచి చూడాలని సూచించారు. మన్మోహన్ ఒక్కడు నీతిగా ఉంటే సరిపోదని, పగ్గాలు చేపట్టినందుకు పాలన సక్రమంగా చేయాలని అన్నారు. మన్మోహన్ ప్రధాని అని గుర్తుంచు కోవాలన్నారు. 14ఎఫ్ రద్దు చేశాకే ఎస్సై పరీక్షలు నిర్వహించాలని డిమాండ్ చేశారు. 14ఎఫ్ రద్దుకు ఏకాభిప్రాయం అవసరం లేదు కదా అని ఆయన ప్రశ్నించారు. భిన్నాభిప్రాయాలు ఉన్నప్పుడే విభజన ఆవశ్యం అని అన్నారు. బాగున్న సోనియా గాంధీ కోసం పూజలు చేస్తున్న కాంగ్రెసు నేతలు అసువులు బాసిన విద్యార్థుల కోసం ఏం చేస్తున్నారని అన్నారు.

Published On August 7, 2011