టిడిపి, కాంగ్రెసు తప్పించుకునే ధోరణి: కోదండరామ్

హైదరాబాద్: తెలంగాణ ప్రజల సహనాన్ని బలహీనతగా చూడవద్దని తెలంగాణ రాజకీయ ఐక్య కార్యాచరణ సమితి చైర్మన్ ప్రొఫెసర్ కోదండరామ్ సోమవారం ప్రభుత్వాన్ని హెచ్చరించారు. తెలంగాణపై కాంగ్రెసు, తెలుగుదేశం పార్టీ తెలంగాణ నేతలు ఒకరిపై ఒకరు చెప్పి తప్పించుకునే ప్రయత్నాలు చేస్తున్నారని ఆరోపించారు. తెలంగాణను అడ్డుకునే శక్తుల సంగతి చూస్తామని హెచ్చరించారు. ఈ నెల తెలంగాణ విద్యార్థి ఐక్య కార్యాచరణ సమితి చేపట్టిన బందుకు మద్దతు ఇస్తున్నామని ఆయన ప్రకటించారు. తెలంగాణ ప్రజా ప్రతినిధులు వెంటనే రాజీనామా చేయాలని డిమాండ్ చేశారు.

సకల జనుల సమ్మెలో జరిగే పరిణామాలకు కేంద్ర హోంమంత్రి చిదంబరమే బాధ్యత వహించాలని అన్నారు. సమ్మెలో అందరూ పాల్గొనేలా రెండు మూడు రోజుల్లో కార్యాచరణ రూపొందిస్తామని చెప్పారు. తెలంగాణ ప్రజాప్రతినిధులు రాజీనామాలు చేసి తమతో కలిసి రాకపోతే తగిన బుద్ది చెబుతామని తెలంగాణ ఉద్యోగ సంఘాల నేత స్వామి గౌడ్ హెచ్చరించారు. ఈ నెల 12న కార్యాచరణ ప్రకటిస్తామని చెప్పారు. ప్రభుత్వం ఎస్మా పేరు చెప్పి ఉద్యోగులను లొంగదీసుకోవాలని చూస్తే భయపడేది లేదని ఉద్యోగ సంఘాలు తెలిపాయి. తెలంగాణ ఉద్యోగులు చేస్తున్న సమ్మెకు సీమాంధ్ర ఉద్యోగులు సైతం మద్దతు ప్రకటించాలని వారు డిమాండ్ చేశారు.

English summary

Telangana political JAC chairman Kodandaram blamed Telugudesam and Congress party on resignations.