ఆస్తుల కేసులో వైయస్ జగన్ అరెస్టు ఖాయమా?

హైదరాబాద్: ఆస్తులపై సిబిఐ దర్యాప్తు చేస్తున్న క్రమంలో వైయస్సార్ కాంగ్రెసు పార్టీ అధ్యక్షుడు వైయస్ జగన్ అరెస్టు జరుగుతుందని న్యాయనిపుణులు అభిప్రాయపడుతున్నట్లు ఎకనమిక్ టైమ్స్ అనే పత్రిక రాసింది. దర్యాప్తు జరుగుతున్న క్రమంలో సాక్ష్యాలను తారుమారు చేసే ప్రమాదం ఉందని సిబిఐ భావిస్తే జగన్‌ను, ఇతరులను సిబిఐ అరెస్టు చేయవచ్చునని తెలుగుదేశం పార్టీ నాయకుడు కె. ఎర్రంనాయుడు తరఫు న్యాయవాది డి. శ్రీనివాస్ చెప్పినట్లు ఆ పత్రిక రాసింది. అవినీతి నిరోధక చట్టం, మనీలాండరింగ్ నిరోధక చట్టం కింద అభియోగాలు రుజువైతే ఆస్తులను కూడా జప్తు చేసే అవకాశాలున్నట్లు ఆయన అభిప్రాయపడినట్లు ఎకనమిక్ టైమ్స్ రాసింది.

దేశంలో అత్యంత సంపన్నుడైన పార్లమెంటు సభ్యుడు వైయస్ జగన్ సిబిఐ దర్యాప్తు క్రమంలో అరెస్టు కావచ్చునని ఆ పత్రిక రాసింది. అవినీతి నిరోధక, మనీలాండరింగ్ నిరోధక చట్టాల కింద సిబిఐ క్రిమినల్ కేసులు నమోదు చేసి దర్యాప్తు చేపడుతుంది. సత్యం కేసులో మాదిరిగా వైయస్ జగన్ ఆస్తుల కేసులో కూడా సిబిఐ మల్టీ డిసిప్లనరీ టీమ్‌ను ఏర్పాటు చేసి దర్యాప్తు సాగించే అవకాశాలున్నట్లు కూడా ఎకనమిక్ టైమ్స్ రాసింది. మనీ లాండరింగ్, హవాలా లావాదేవీలు, పన్ను ఎగవేయడానికి మార్గాలున్న దేశాల నుంచి పెట్టుబడుల స్వీకరణ వంటి ఆరోపణలు ఉన్న నేపథ్యంలో దర్యాప్తు బృందంలో ఎన్‌ఫోర్స్‌మెంట్ డైరెక్టరేట్, ఆదాయం పన్ను, ఇతర సంస్థల అధికారులు ఉండే అవకాశాలున్నట్లు ఆ పత్రిక రాసింది.

English summary

According to Economic Times report - With the Andhra Pradesh High Court ordering a full-fledged Central Bureau of Investigation (CBI) probe into his alleged illegal wealth, India's richest MP Y.S. Jaganmohan Reddy may face arrest and his assets are likely to be seized.