తెలంగాణపై చిదంబరం అదే మాట, అదే పాట

By Srinivas

Published: Friday, August 12, 2011, 15:25 [IST]

న్యూఢిల్లీ: తెలంగాణపై కేంద్ర మంత్రి చిదంబరం మళ్లీ పాత పాటే పాడారు. తెలంగాణ రాష్ట్రంపై మరో నాలుగు పార్టీలు అభిప్రాయం చెప్పవలసి ఉన్నదని ఆయా పార్టీలు వాటి అభిప్రాయం చెప్పిన తర్వాతే రాష్ట్రంలోని అన్ని పార్టీలతో అఖిలపక్షం ఏర్పాటు చేస్తామని చెప్పారు. రాష్ట్రంలో ఎనిమిది ప్రధాన పార్టీలలో నాలుగు తమ అభిప్రాయం చెప్పాయని, మరో నాలుగు చెప్పవలసి ఉన్నదని అన్నారు. 14ఎఫ్ పేరా రద్దు చేయాలని రాష్ట్రపతి ప్రతిభా పాటిల్‌కు సిఫార్సు చేశామని చెప్పారు. హైదరాబాదు జోన్‌ను ఆరో జోన్‌గా పరిగణిస్తూ రాష్ట్రపతి ఉత్తర్వులు జారీ చేసిందని చెప్పారు.

కాగా తెలంగాణపై చిదంబరం చేసే ప్రకటనలలో కొత్తదనం ఏమీ కనిపించడం లేదు. ఇటీవల తనతో భేటీ అవుతున్న సీమాంధ్ర, తెలంగాణ ప్రజా ప్రతినిధులతోనూ త్వరలో సమస్య పరిష్కారం అవుతుందని చెప్పడం మినహా మరో హామీ ఇచ్చినట్లుగా కనిపించలేదు. ఇటీవల పార్లమెంటులో ప్రతిపక్ష నేత సుష్మా స్వరాజ్ తెలంగాణపై సావధాన తీర్మానం ప్రవేశ పెట్టిన సమయంలోనూ తెలంగాణ అంశాన్ని తెలుగు ప్రజలే తేల్చుకోవాలని చెప్పి చేతులు దులుపుకున్నారు.

Published On August 12, 2011