రామోజీ, చంద్రబాబులపైకి నెట్టిన జగన్ సాక్షి డైలీ

By Pratap

Published: Friday, August 12, 2011, 9:13 [IST]

హైదరాబాద్: ఎమ్మార్ ప్రాపర్టీస్ వ్యవహారాన్ని వైయస్సార్ కాంగ్రెసు పార్టీ అధ్యక్షుడు వైయస్ జగన్‌కు చెందిన సాక్షి డైలీ తెలుగుదేశం పార్టీ అధ్యక్షుడు నారా చంద్రబాబు నాయుడు, ఈనాడు అధిపతి రామోజీరావుపైకి నెట్టే ప్రయత్నం చేసింది. ఈ మేరకు సాక్షి దినపత్రికలో ఓ వార్తాకథనం ప్రచురితమైంది. ఎమ్మార్ ప్రాపర్టీస్ కుంభకోణంపై కేసు నమోదు చేసి పూర్తి స్థాయి విచారణ జరపాలని హైకోర్టు సిబిఐని ఆదేశించిన నేపథ్యంలో ఈ వార్తాకథనాన్ని సాక్షి డైలీ శుక్రవారం ప్రచురించింది. ఎపిఐఐసికి, ఎమ్మార్ ప్రాపర్టీస్‌కు మధ్య జరిగిన వ్యవహారం ప్రధానంగా దర్యాప్తు పరిధిలోకి రానుంది. ఆ సమయంలో వైయస్ జగన్ పార్టీకి చెందిన అంబటి రాంబాబు ఎపిఐఐసి చైర్మన్‌గా ఉన్నారు.

సాక్షి డైలీ విజిలెన్స్ అండ్ ఎన్‌ఫోర్స్‌మెంట్ నివేదికను ఉటంకిస్తూ కోనేరు ప్రసాద్ అనే వ్యక్తికి ఎమ్మార్ ప్రాపర్టీస్‌తో సంబంధాలు ఉన్నాయని సాక్షి రాసింది. కోనేరు ప్రసాద్ తెలుగుదేశం పార్టీ అధ్యక్షుడు నారా చంద్రబాబు నాయుడికి అత్యంత సన్నిహితుడని వ్యాఖ్యానించింది. ప్రసాద్‌కు ఎమ్మార్‌తో ఉన్న లింకు తెలిస్తే వాస్తవాలు వెలుగులోకి వస్తాయని రాసింది. చంద్రబాబు అస్తుల వ్యవహారాల పర్యవేక్షుకుడు కోనేరు ప్రసాదేనని వ్యాఖ్యానించిది. కోనేరు చారిటబుల్ ట్రస్టుకు చైర్మన్ ఈనాడు ఎఁడి రమేష్‌బాబు అని అంటూ ఆ రకంగా వ్యవహారాన్ని ఈనాడు అధినేత రామోజీరావుకు అంటగట్టే ప్రయత్నం చేసింది. కోనేరు - బాబు - ఈనాడు లింకులున్నాయని ఆరోపించింది.

Published On August 12, 2011