కేంద్రానికి చెప్పాల్సింది చెప్పాం: తెలంగాణపై చంద్రబాబు

By Srinivas

Published: Sunday, August 14, 2011, 14:40 [IST]

హైదరాబాద్: తెలంగాణ అంశం కేంద్రమే పరిష్కరించాలని తెలుగుదేశం పార్టీ అధినేత నారా చంద్రబాబు నాయుడు ఆదివారం ఎన్టీఆర్ ట్రస్టు భవనంలో ఏర్పాటు చేసిన మీడియా సమావేశంలో అన్నారు. తెలంగాణపై టిడిపి తాను చెప్పాల్సింది ఎప్పుడో చెప్పిందన్నారు. కేంద్రం ఏర్పాటు చేసే అఖిలపక్ష సమావేశానికి టిడిపి వెళ్లదన్నారు. టిడిపి వెళ్లదని అప్పుడు చెప్పాం, ఇప్పుడు చెబుతున్నామన్నారు. సామాజిక సంఘ సంస్కర్త అన్నా హజారే దీక్షలకు కేంద్రం షరతులు విధించడం సరికాదన్నారు. ప్రజాస్వామ్యంలో నిరసనలు చేసుకునే హక్కు ఉంటుందన్నారు. ప్రజాస్వామ్యబద్దంగా తెలిపే నిరసనలను కేంద్రం బలవంతంగా అణిచివేయాలనుకోవడం సరికాదన్నారు.

దేశంలో అవినీతి పెరిగిపోయిందన్నారు. కోర్టులు కలుగ జేసుకోవడం వల్లనే అవినీతి, అక్రమాలపై విచారణలు జరుగుతున్నాయన్నారు. అవినీతిపై ప్రధాన మంత్రి మన్మోహన్ సింగ్ వ్యాఖ్యలు హాస్యాస్పదం అన్నారు. ముఖ్యమంత్రి కిరణ్ కుమార్ రెడ్డి రైతు సమస్యలపై వాస్తవ పరిస్థితులు తెలుసుకోవడానికి ప్రయత్నించడం లేదన్నారు. పంట విరామాన్ని ప్రకటిస్తున్న రైతుల వద్దకు వెళ్లి మాట్లాడలేని చేతకాని స్థితిలో ముఖ్యమంత్రి ఉన్నారన్నారు.

Published On August 14, 2011