'హజారేనే జైల్లో పెట్టారు, ఇక జగన్ వదిలేస్తారా?'

By Srinivas

Published: Thursday, August 18, 2011, 9:57 [IST]

హైదరాబాద్: జాతీయస్థాయిలోని అవినీతిపై పోరాటం చేస్తున్న సంఘ సంస్కర్త అన్నాహజారేను యుపిఏ ప్రభుత్వం తీహారు జైలుకు పంపించిందని ఇక వైయస్సార్సీ పార్టీ అధినేత వైయస్ జగన్మోహన్ రెడ్డిని వదిలేస్తారా అని ఆ పార్టీ నేత గట్టు రామచంద్రారావు గురువారం అనుమానాలు వ్యక్తం చేశారు. జగన్‌పై కక్ష సాధించేందుకే కాంగ్రెసు పార్టీ ఇలాంటి కుట్ర చేస్తుందని ఆరోపించారు. కక్ష సాధించడానికే కాంగ్రెసు పార్టీ నేత శంకర రావు కోర్టుకు లేఖలు రాశారని అన్నారు. కోర్టు తీర్పును తాము తప్పుపట్టడం లేదని అయితే కోర్టుకు వెళ్లిన నేతల తీరును మాత్రమే తాము తప్పుపడుతున్నట్టు చెప్పారు.

కోర్టు తీర్పులు గౌరవిస్తామని చెప్పారు. జగన్‌పై కోర్టుకు లేఖ రాసిన మంత్రి శంకర రావుది రాజకీయ కుట్ర కాదా అని ప్రశ్నించారు. అయితే కోర్టు తీర్పు మేరకు ఎలాంటి విచారణకైనా తాము సిద్ధమని ప్రకటించారు. కాగా జగన్ కంపెనీలు, ఇళ్లలో సోదాలు నిర్వహిస్తున్న సిబిఐ అధికారులు కడప జిల్లాలోని భారతి సిమెంటుకు కేటాయించిన రెండు వేల ఎకరాల సున్నపురాయి గనులపై వివరాలను ఆరా తీసింది.

Published On August 18, 2011