రాహుల్ గాంధీ సమక్షంలో చిరంజీవి కాంగ్రెసు తీర్థం

By Pratap

Published: Saturday, August 20, 2011, 19:22 [IST]

న్యూఢిల్లీ: రాజీవ్ గాంధీ జయంతి రోజు ప్రజారాజ్యం పార్టీ అధ్యక్షుడు చిరంజీవి కాంగ్రెసు నేత రాహుల్ గాంధీ సమక్షంలో కాంగ్రెసు తీర్థం పుచ్చుకున్నారు. దీంతో మూడేళ్ల ప్రజారాజ్యం ప్రస్థానం ముగిసినట్లే. చిరంజీవికి కాంగ్రెసు కండువా కప్పి కాంగ్రెసు పార్టీలోకి ఆహ్వానించారు. సోనియా నాయకత్వంలోని కాంగ్రెసు పార్టీలో పనిచేయడానికి సిద్ధంగా ఉన్నానని చిరంజీవి చెప్పారు. రాష్ట్ర కాంగ్రెసు నాయకులు పలువురు ఈ కార్యక్రమానికి వచ్చారు. ఎఐసిసి కార్యాలయంలో చిరంజీవి కాంగ్రెసు పార్టీలో చేరారు. చిరంజీవి జాతీయ పార్టీలో చేరడం శుభపరిణామమని కాంగ్రెసు ఆంధ్రప్రదేశ్ వ్యవహారాల ఇంచార్జీ గులాం నబీ ఆజాద్ అన్నారు. ఇక చిరంజీవి తమ పార్టీలో అంతర్భాగమని ఆయన అన్నారు. తాను కాంగ్రెసు చేరడం మరుపురాని ఘట్టమని ఆయన అన్నారు.

చిరంజీవి కాంగ్రెసులో చేరిన సందర్భంలో రాహుల్ గాంధీ మాట కూడా మాట్లాడలేదు. మాట్లాడడం మొదలు పెడితే అన్నా హజారే గురించి ప్రశ్నలు వస్తాయని ఆయన భావించి ఉండవచ్చునని అంటున్నారు. చిరంజీవి పార్టీలో చేరడం పూర్తయిన తర్వాత ఆయన వెళ్లిపోయారు. తనకు శక్తికి మరో శక్తి తోడైతే ఆశయ సాధన సులభమవుతుందని చిరంజీవి అన్నారు. తాను కాంగ్రెసులో చేరిన సందర్భంలో సోనియా లేకపోవడం అసంతృప్తి కలిగించిందని ఆయన అన్నారు. పార్టీ ఏ బాధ్యతను అప్పగించినా శిరసా వహిస్తానని ఆయన చెప్పారు. తాను సోనియా గాంధీని రెండు సార్లు కలిశానని, ఆమె తనను ఎంతో ఆదరించారని, దీంతో సోనియా నాయకత్వంలో పనిచేయాలని తనకు అనిపించిందని ఆయన అన్నారు.

కాంగ్రెసులో చేరడం వల్ల ఉభయతారకంగా ఉంటుందని భావించినట్లు ఆయన తెలిపారు. రాహుల్ నాయకత్వం దేశానికి అవసరమని ఆయన అన్నారు. భవిష్యత్తులో అవినీతి రహిత భారతదేశాన్ని చూస్తానని ఆయన అన్నారు. రాహుల్ గాంధీ మనస్ఫూర్తిగా మాట్లాడారని, తనతో ప్రత్యేకంగా మాట్లాడుతానని చెప్పారని, యువతను ముందుకు నడిపించాల్సిన అవసరం ఉందని చెప్పారని ఆయన అన్నారు. రాహుల్ గాంధీ ప్రధాని కావాలని తాను అనుకుంటున్నానని ఆయన అన్నారు. కాంగ్రెసు కుటుంబ సభ్యుడిగా తాను గర్విస్తున్నానని ఆయన అన్నారు.

చిరంజీవి కాంగ్రెసులో చేరిన కార్యక్రమానికి గులాం నబీ ఆజాద్‌తో పాటు జనార్దన్ ద్వివేది, ఎస్ జైపాల్ రెడ్డి, అహ్మద్ పటేల్, కెవిపి రామచందర్ రావు, వి హనుమంతరావు హాజరయ్యారు. రాష్ట్రానికి చెందిన పలువురు పార్లమెంటు సభ్యులు, నాయకులు చిరంజీవిని అభినందించారు.

Published On August 20, 2011