జగన్ వర్గం రాజీనామా: సిఎం దిద్దుబాటు చర్యలు

By Srinivas

Published: Monday, August 22, 2011, 11:10 [IST]

హైదరాబాద్: వైయస్సార్ కాంగ్రెసు పార్టీ అధ్యక్షుడు, కడప పార్లమెంటు సభ్యుడు వైయస్ జగన్మోహన్ రెడ్డి వెంట మరికొంత మంది కాంగ్రెసు ప్రజాప్రతినిధులు ఉన్నారని జగన్ వర్గం హెచ్చరికల నేపథ్యంలో ముఖ్యమంత్రి కిరణ్ కుమార్ రెడ్డి దిద్దుబాటు చర్యలకు దిగినట్లుగా కనిపిస్తోంది. ఇప్పటికే కాంగ్రెసు నుండి 23తో సహా మొత్తం 26 మంది రాజీనామాలకు సిద్ధమైన నేపథ్యంలో మరికొందరు కాంగ్రెసు నేతలు జగన్ వెంట వెళ్లకుండా ఉండేందుకు ముఖ్యమంత్రి రంగంలోకి దిగినట్లుగా కనిపిస్తోంది. జిల్లాల నుండి ఎవరూ జగన్‌తో వెళ్లకుండా ఉండేందుకు ప్రయత్నాలు చేస్తున్నట్టుగా తెలుస్తోంది.

ఇందుకోసం మంత్రులను రంగంలోకి దించినట్లుగా కనిపిస్తోంది. పర్యటనలలో ఉన్న మంత్రులతో ఫోన్‌లో మంతనాలు జరిపినట్లుగా తెలుస్తోంది. ఎవరూ జగన్ వెంట వెళ్లకుండా తీసుకోవాల్సిన బాధ్యతలను వారికి అప్పగించినట్లుగా తెలుస్తోంది. సోమవారం ఉదయం ఉప ముఖ్యమంత్రి దామోదర రాజనర్సింహ, మంత్రులు ధర్మాన ప్రసాద రావు, రఘువీరా రెడ్డి, శ్రీధర్ బాబు, ఆనం రామనారాయణ రెడ్డి, ముఖేష్ గౌడ్ తదితరులతో క్యాంపు కార్యాలయంలో ముఖ్యమంత్రి సమావేశమై తాజా రాజకీయాలపై చర్చిస్తున్నట్టుగా సమాచారం.

Published On August 22, 2011