వైయస్సార్‌పై దోపిడీ, హత్య కేసులు ఉండేవి: ఎర్రబెల్లి

By Pratap

Published: Monday, August 22, 2011, 19:00 [IST]

హైదరాబాద్: దివంగత నేత వైయస్ రాజశేఖర రెడ్డిపై హత్య, దోపిడీ కేసులు ఉండేవని, ముఖ్యమంత్రి కాగానే వాటిని రద్దు చేయించుకున్నారని తెలుగుదేశం పార్టీ నాయకుడు ఎర్రబెల్లి దయాకర్ రావు అన్నారు. చనిపోయినంత మాత్రాన వైయస్ రాజశేఖర రెడ్డి మహాత్ముడు కాలేరని ఆయన సోమవారం మీడియా ప్రతినిధుల సమావేశంలో వ్యాఖ్యానించారు. వైయస్ జగన్ అంతటి అవినీతిపరుడు ప్రపంచంలోనే లేడని ఆయన అన్నారు. కాంగ్రెసు శాసనసభ్యులు వైయస్ జగన్‌కు అమ్ముడుపోయారని ఆయన విమర్శించారు.

వైయస్ జగన్ వర్గం శాసనసభ్యుల రాజీనామాలతో ముఖ్యమంత్రి కిరణ్ కుమార్ రెడ్డి ప్రభుత్వం మైనారిటీలో పడిపోయిందని తెలుగుదేశం మరో నేత కడియం శ్రీహరి అన్నారు. ముఖ్యమంత్రి పదవికి వెంటనే రాజీనామా చేయాలని ఆయన సోమవారం మీడియా ప్రతినిధుల సమావేశంలో కిరణ్ కుమార్ రెడ్డిని డిమాండ్ చేశారు. లేదంటే గవర్నన్ వెంటనే కిరణ్ కుమార్ రెడ్డిని వెంటనే బర్తరఫ్ చేయాలని ఆయన కోరారు. కాంగ్రెసు ప్రభుత్వాన్ని భరించడానికి ప్రజలు ఒక్క క్షణం కూడా సిద్ధంగా లేరని ఆయన అన్నారు.

Published On August 22, 2011